Եթե ԼՂ հակամարտության գոտում պատերազմ վերսկսվի, կտուժեն նաև նրանք, ովքեր զենք են վաճառում կողմերին: Այսօր Մամուլի ազգային ակումբի նախաձեռնությամբ «Աշխարհը և մենք» ծրագրի և «Հայ-իրանական հարաբերություններ», «Իրանը և տարածաշրջանը» թեմաների շրջանակներում լրագրողների հետ հանդիպման ժամանակ նշեց ՀՀ-ում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսին:
Հարցին, թե Ուկրաինա-Ռուսաստան հակամարտության արդյունքում Արևմուտքի ցանկությունը՝ նվազեցնել կախվածությունը ռուսական էներգակիրներից, կարելի՞ է բավարարել իրանական գազը Հայաստանի միջոցով Եվրոպա հասցնելով, դեսպանը պատասխանեց, որ բազմաթիվ անգամներ նշել է, որ Հայաստանի տարածքով էներգակիրների տարանցման համար համապատասխան ենթակառուցվածք է անհրաժեշտ: Ըստ նրա՝ Իրանը ՌԴ-ի հետ լավ հարաբերություններ ունի, և այդ երկու երկրները կարող են մասնավորապես համագործակցել գազի ոլորտում:
«Իսկ համապատասխան ենթակառուցվածք ստեղծելու համար ՀՀ կառավարությանն անհրաժեշտ է ժամանակ»,- ասաց նա:
Դիտարկմանը՝ Իրան-Հայաստան գազամուղը հարմար ենթակառուցվածք չէ՞ այդ հեռանկարն իրողություն դարձնելու համար, նա արձագանքեց՝ երբ նախագծվել է գազամուղը, համապատասխանել է այդ ժամանակի պահանջին, բայց ներկայիս ծավալներին այն հարմար չէ: «Այդ տրամաչափով հնարավոր չէ տարանցում իրականացնել»,- ասաց նա:
Անդրադառնալով Իրանի նախագահի հնարավոր այցին Հայաստան՝ դեսպանն ասաց, որ հետամուտ են այցի կազմակերպմանը: Ըստ նրա՝ պարզապես պետք է հաշվի առնել, որ նախագահների գրաֆիկները սովորաբար չափազանց հագեցած են, և այց կազմակերպելը բարդ է: Թեև վստահեցրեց, որ այց անպայման տեղի կունենա, բայց թե երբ՝ չնշեց:
Խոսելով նաև տարածաշրջանում զենքի վաճառքից՝ նա շեշտեց, որ եթե ԼՂ հակամարտության գոտում պատերազմ վերսկսվի, կտուժեն նաև նրանք, ովքեր վաճառում են այդ զենքը: «Նրանք բիզնեսի ետևից են ընկել: Զենքերը վաճառում են՝ շահից ելնելով, գիտեն, որ այն ապահովություն չի բերելու»,- ասաց դեսպանը:
Լուսանկարը` PAN Photo-ի