ՄԱԿ-ի մանկական հիմնադրամը մի շարք հասարակական կազմակերպությունների հետ Սիրահարների այգում մեկնարկեց հաշմանդամություն ունեցող երեխաների սոցիալական ներառմանն ուղղված արշավը՝ «Կարող ենք միասին» կարգախոսով:
Միջոցառման նպատակն է խթանել ներառական կրթության գաղափարը, ինչպես նաև նպաստել հաշմանդամություն ունեցող երեխաների լիարժեք ինտեգրմանը հասարակություն:
Արշավին մասնակցում էին հաշմանդամություն ունեցող երեխաներ՝ տարբեր մարզերից: Նրանց ծնողների պնդմամբ՝ իրենք ամեն օր հանրությանը ապացուցում են, որ սահմանափակ կարողություններով երեխան ևս կարող է սպորտով զբաղվել, լեռ բարձրանալ, ներկայացման մեջ խաղալ, ծրագրավորղ դառնալ ու հաջողությունների հասնել:
Նրանց համոզմամբ՝ ներառական կրթությունը թույլ է տալիս, որպեսզի իրենց երեխան ինտեգրվի ընդհանուր միջավայրին:
Աշխատանքի և սոցիալական հարցերի փոխնախարար Ջեմմա Բաղդասարյանը միջոցառման ընթացքում ընդգծեց, որ Հայաստանը ձեռնամուխ է եղել երեխաների սոցիալական պաշտպանության համակարգի վերակազմավորման գործընթացին. «Այս համատեքստում հատկապես կարևոր է այն, որ այս երեխաների իրավունքները ճանաչված և պաշտպանված լինեն»,- ասաց փոխնախարարը՝ հավելելով, որ Հայաստանում կա հաշմանդամություն ունեցող շուրջ 8 հազար անձ: