«Այդ խնդիրն ավելի շատ քաղաքապետարանինն է, քան ոստիկանությանը»,- ասաց փոխոստիկանապետ Սամվել Հովհաննիսյանը՝ արձագանքելով բնակելի շենքերի տակ զվարճանքի օբյեկտների պահպանությանը և ժամը 24-ից հետո այդ օբյեկտների բարձր երաժշտությունից ու աղմուկից բողոքող քաղաքացիների բողոքներին:
Նշենք, որ Խանջյան 31 շենքի, Մաշտոցի պողոտայի «Քամելոտ» ռեստորանի վերևի հարկի և քաղաքի տարբեր հատվածում բնակելի շենքերի առաջին և նկուղային հարկերում տեղակայված զվարճանքի վայրերի՝ բարերի, կարաոկեների ու դիսկոտեկների աշխատանքից բնակիչները բազմիցս են բողոքել: Դիմել են քաղաքապետարան, ոստիկանություն, քանի որ լռության կանոնների պահպանումը ոստիկանության իրավասությունների շրջանակում է, սակայն անօգուտ: Բարերն ու դիսկոտեկները շարունակում են աշխատել մինչ լուսաբաց, երբեմն 24-ժամյա գրաֆիկով՝ երաժշտության աղմուկը հասցնելով մինչ 4-5-րդ հարկ կամ ավելի բարձր:
«Այսօր նման լաբորատոր փորձաքննություն իրականացնելու հնարավորություն ունի առողջապահության նախարարության համապատասխան ստորաբաժանումը. գալիս են, չափագրում, թե ինչ դեցիբելի է հասնում այդ աղմուկը, և համապատասխան կարգագիր են ներկայացնում: Իսկ ինչ վերաբերում է նման օբյեկտների աշխատանքային ռեժիմին, ապա այդ թույլտվությունը տրվում է քաղաքապետարանի կողից,- ասաց փոխոստիկանապետը՝ հավելելով,- ինչ վերաբերում է մեր ծառայության կազմակերպմանը, ապա ծառայության մատուցումը կարող է լինել երկու տարբերակով՝ հասարակական կարգի պահպանություն կամ օբյեկտի պահպանություն: Հիմա ես կոնկրետ չեմ կարող ասել, թե այդ հատվածում ծառայությունների մատուցման ինչ պայմանագիր է կնքված: Բայց այն, որ ոստիկանության աշխատակիցը պարտավոր է ցանկացած իրավախախտման միջամտել և հարցը լուծել, դա անքննարկելի է: Բայց, կրկնում եմ, ձայնի հետ կապված խնդիրն ավելի շատ քաղաքապետարանինն է, քան ոստիկանությանը»:
Սամավել Հովհաննիսյանի խոսքով՝ ճիշտ է, իրենք լռությունը խախտելու դեպքերում կազմում են համապատասխան արձանագրություններ, բայց այն իր մեջ չի պարունակում կրկնողություն, թե երկրորդ-երրորդ անգամ կրկնվելու դեպքում ինչ կլինի այս օբյեկտի հետ: «Մենք կարող ենք վերակարգը հանել այդտեղից, վերակարգ դնել, բայց խնդիրը ոստիկանական գործառույթների մեջ չէ: Եթե մարդը բողոքում է, որ գիշերվա 2-ին, 3-ին այդ օբյեկտը բաց է, ապա դա արդեն քաղաքապետարանի լիազորությունն է: Ճիշտ է մեզ համար ավելի լավ կլինի, որ այդ օբյեկտները գոնե փակվեն շենքերի տակ 24:00-ից հետո, բայց որոշողը…»,- միտքը կիսատ թողնելով՝ եզրափակեց փոխոստիկանապետը:
Նշենք, որ այս խնդրի հետ կապված Երևանի ավագանու «Բարև Երևան» դաշինքի անդամ Անահիտ Բախշյանը նամակով դիմել է նաև քաղաքապետ Տարոն Մարգարյանին՝ խնդրելով լուծում տալ հարցին, որպեսզի զվարճանքի վայրերն իրենց բիզնեսը չկառուցեն քաղաքացիների հանգստի և անդորրի հաշվին:
