Այսօր Վարդենիսի շուրջ 80 ֆերմերներ կառավարության մոտ էին եկել՝ հանդիպելու վարչապետ Հովիկ Աբրահամյանին:
Գյուղացիների պնդմամբ՝ դեռ 2012թ. ռուսական ընկերության կողմից ներմուծված ցորենի սերմերը, որոնք վաճառել են իրենց, անորակ են եղել, երաշտ է եղել, և ոչ մի օգուտ գյուղացին չի ստացել ցանած ցորենից: Արդեն երկու տարի է՝ գյուղացիները չեն կարողանում ո՛չ վնասի չափը մեղմել, ո՛չ նոր ցանք կատարել, քանի որ սնանկացել են:
«2011-ին վերցրել էինք, մեկին երկուս պետք է 2012-ին վերադարձնեինք: Հա՛մ տարին էր անբարենպաստ, հա՛մ սերմերը՝ անորակ, մեր կլիմային չդիմացան, լրիվ շարքից դուրս եկան: Մեր ամբողջ ունեցվածքը կալանքի տակ է, բայց ոչ մի վճիռ չեն կայացնում հօգուտ մեզ»,- ասաց ֆերմերներից մեկը՝ հավելելով, որ երեք օր առաջ տեղացած առատ կարկուտի պատճառով նորից ամեն ինչ փչացավ:
«Հիմա եկել ենք վարչապետին հիշեցնենք, որ մեզ խաբել են, անորակ սերմ են տվել»,- ասացին նրանք:
Միայն Վարդենիսից տուժել է 76 ֆերմեր:
Նրանք ասացին, որ էլիտար սերմեր անվան տակ պարենային հացահատիկ է բերել-բաժանել. «Փոխանակ գնանք, գյուղատնտեսությամբ զբաղվենք, մեր տները կալանքի տակ են, ընկել ենք մեր դատարանները: Յուրաքանչյուրին 2-3 կամ չորս միլիոն, ընդհուպ մինչև վեց միլիոն»:
Եթե սերմերը ոչ թե լինեին ՌԴ-ից ներմուծված, այլ տեղական, վնասը այդքան մեծ չէր լինի. տեղականի հետ կապված դժգոհություններ չկան:
Այսօր նրանց վարչապետի հետ հանդիպել չստացվեց, փոխարենը գյուղնախարար Սերգո Կարապետյանը կընդունի նրանց:
Ավելին՝ տեսանյութում: