Աշխարհում քաղցկեղով տարեկան հիվանդանում է շուրջ 200.000 երեխա: Մեր հանրապետությունում ուռուցքաբանության ոլորտում մանկական քաղցկեղը համարվում է առավել երիտասարդ ուղղություն, սակայն յուրաքանչյուր տարի արձանագրվում է մանկական քաղցկեղի ախտորոշման 90-100 նոր դեպք:
«Առաջին լրատվական»-ի հետ զրույցում մասնագետը նշեց, որ վերջին տարիներին քաղցկեղով հիվանդների թիվը որևէ էական փոփոխության չի ենթարկվել: Սա կարելի է դրական գնահատել՝ այն առումով, որ հիվանդների թվի աճ չի նկատվում: Սակայն չի փոխվում նաև լիարժեք բուժվածների թիվը: Մասնագետի խոսքով՝ տասը տարուց ավելի է, ինչ գրանցվում է բուժման արդյունավետության նույն տոկոսը, ինչը նշանակում է, որ այս տարիների ընթացքում լուրջ դրական տեղաշարժ ևս չկա:
Նշենք, որ մանկական քաղցկեղով հիվանդացության խոցելի խումբ են 2-4 և 11-14 տարեկան երեխաները:
Մեծահասակների մոտ առավել հաճախ հանդիպում են կրծքագեղձի, արգանդի վզիկի, թոքի քաղցկեղով հիվանդացության դեպքեր:
Ի տարբերություն մեծահասակների՝ երեխաների մոտ ամենահաճախ հանդիպողը արյան քաղցկեղն է՝ լեյկեմիան, որը ընդհանուր հիվանդացության թվի 1 քառորդն է կազմում, հաջորդում են ավշային հանգույցների, ապա գլխուղեղի ուռուցքները:
Մանկական քաղցկեղի առաջացման պատճառներին անդրադառնալով՝ հարկ է նշել, որ մանկական չարորակ գոյացությունների մեջ ժառանգականության դերը մեծ է միայն աչքի չարորակ ուռուցքների դեպքում: Մնացած դեպքերում երեխաների մոտ չարորակ գոյացությունների առաջացման պատճառներն ամբողջությամբ պարզաբանված չեն, սակայն կան հիվանդության զարգացմանը նպաստող մի շարք գործոններ:
Քաղցկեղի բուժման մեթոդները մեծահասակների և երեխաների մոտ գրեթե նույնն են: Գոյություն ունի բուժման 3 մեթոդ՝ դեղորայքային, ճառագայթային և վիրահատական: Երեխաների դեպքում ամենահաճախ ընտրվում է դեղորայքային բուժման՝ քիմիաթերապիայի մեթոդը: Արդյունքում քաղցկեղով հիվանդ երեխաների 60-65 տոկոսը լիարժեք բուժվում է:
Ինչպես փաստեց ուռուցքաբանության ազգային ինստիտուտի մանկական ուռուցքաբանության և քիմիաթերապիայի բաժանմունքի ղեկավար Գրիգոր Բադալյանը, այսօր Հայաստանում կարելի է լուծված համարել դեղորայքի ձեռքբերման խնդիրը: Վերջինիս փոխանցմամբ՝ պետության և հիմնադրամների կողմից տրամադրվող դեղորայքն ապահովում է անհրաժեշտ քանակը:
Երեխաների բուժման բարձր արդյունավետության ապահովման կարևոր նախադրյալ է հիվանդության վաղ ախտորոշումը: Պարզապես պետք է լինել հետևողական երեխայի առողջության ու լիարժեք զարգացման հարցում: Հուսանք, որ տարիներ անց մանկական քաղցկեղ հիվանդությունն այլևս ոչ մի երեխայի կյանք չի խլի:
