Կենտրոն և Նորք-Մարաշ վարչական շրջանների ընդհանուր իրավասության դատարանում հուլիսի 16-ին Շանթի և ընկերների գործով դատական նիստին հարցաքննության ենթարկվեց գործով տուժող ճանաչված ոստիկան Գեղամ Խաչատրյանը: Շանթ Հարությունյանը, լսելով Խաչատրյանից, որ հենց իրենից է իմացել՝ ցուցարարները շարժվում են դեպի Բաղրամյան 26, տեղից բացականչեց. «Շառ ա անում»: Դատավորը նրան կոչ արեց հանդարտվել:
Հարությունյանը նշեց, թե նույնիսկ իր ընկերներից որևէ մեկը չգիտեր՝ ինքն ուր է գնալու: «Իմ սաուչաստնիկներն են, չէ՞: Հիմա ինքը շառ ա անում: Ասում եմ՝ տենց բան չի եղել, ոչ մեկը չի իմացել՝ ես ուր եմ գնալու: Որտեղի՞ց եք իմացել, որ ես գնալու եմ Բաղրամյան 26»,- ասաց նա:
Նիստը նախագահող դատավոր Մնացական Մարտիրոսյանը նրա նկատմամբ սանկցիա կիրառեց՝ նախազգուշացում, որ իր պահվաքծի համար 36 ժամով դատական նիստերին ներկայանալուց կզրկվի:
Դիմելով տուժողին՝ Շանթը հետաքրքրվեց. «Ես բարձր հայտարարեցի՞, որ գնում եմ Բաղրամյան 26, լսեցի՞ք, ճշտեմ, որովհետև ես կարող ա՝ գոռամ, բայց կարող ա կողքս, իմ ընկերների հետ, ես չիմանամ, ասեմ, մեկը լսի»: Խաչատրյանը պատասխանեց՝ երեք մետր հեռավորությամբ:
Տուժողը նշեց, թե ինքը պատմում է այն, ինչ եղել է: Շանթ Հարությունյանը դատարանին հորդորեց ցուցադրել տեսանյութերը, որոնցում հստակ երևում է՝ ինքը նման բան չի ասել:
Լուսանկարը` PAN Photo-ի