Հայաստանի Ազգային ժողովը դարձել է Ֆրանկոֆոնիայի խորհրդարանական վեհաժողովի լիարժեք անդամ: Այս մասին այսօր լրագրողների հետ հանդիպմանը ասաց ՀՀԿ խմբակցության պատգամավոր Մարգարիտ Եսայանը, ով մասնակցել է վեհաժողովի հերթական նիստին: Բացի Եսայանից՝ Հայաստանի ԱԺ պատվիրակության կազմում են եղել ՀՀԿ-ից՝ Մնացական Մնացականյանը, ՀՅԴ-ից՝ Արմեն Ռուստամյանը:
Ֆրանկոֆոնիայի խորհրդարանական վեհաժողովը աշխարհի 78 երկրների խորհրդարաններից կազմված վեհաժողով է, այն քննարկում է կրթական, ազգային և մշակութային բազմաթիվ խնդիրներ, դրանց տալիս լուծումներ:
Մ. Եսայանը պատմեց նաև, որ բավականին ակտիվ քննարկումներ են տեղի ունեցել, կանանց խորհրդի նիստին քննարկվել են խորհրդարանում կանանց դերի բարձրացման մասին խնդիրներ. «Վերջում ընդունեցինք բանաձև, որով դատապարտում ենք բռնությունն ամբողջ աշխարհում:
Թեպետ Հայաստանը նիստի սկզբում դեռևս լիարժեք անդամ չէր, այդուհանդերձ՝ ՀՀ պատվիրակությունը մասնակցել է բոլոր հանձնաժողովների նիստերին»:
Պատգամավորը նշեց նաև, որ Ֆրանկոֆոնիայի խորհրդարանական վեհաժողովի լիագումար նիստի բացման օրը Ֆրանկոֆոնիայի խրհրդարանական վեհաժողովի նախագահը հանդիսավորությամբ հայտարարել է, որ 40-րդ լիագումար նիստում ՀՀ ԱԺ-ն դարձել է Ֆրանկոֆոնիայի լիարժեք անդամ. «Եթե մեզ տալիս են լիարժեք անդամի կարգավիճակ, մենք օգտվում ենք բոլոր հնարավորություններից ու իրավունքներից , բացի այդ՝ ստանձնում ենք մի շարք պարտականություններ»,- ասաց նա:
Ֆրանկոֆոնիայի խորհրդարանական վեհաժողովի կրթական հանձնաժողովի նիստին մասնակցած հանրապետական պատգամավոր Մնացական Մնացականյանն էլ նշեց, որ Հայաստանի համար չափազանց կարևոր է միջազգային կառույցներում ընդգրկվելը: Հայաստանը այդ երկրներում ունի բավականին մեծ սփյուռք:
Պատգամավորները հանդիպել են նաև տեղի հայ համայնքի ներկայացուցիչների հետ, ովքեր նշել են, որ հեռու գտնվելով՝ ապրում են Հայաստանի բոլոր խնդիրներով, և խոստացել են հնարավորության դեպքում վերադառնալ Հայաստան:
Պատգամավորները գոհունակությամբ նշեցին, որ խնդրել և համաձայնություն են ստացել՝ 2015 թվականին Հայաստանում անցկացնել Ֆրանկոֆոնիայի խորհրդարանական վեհաժողովի նիստը: Մարգարիտ Եսայանի խոսքերով՝ դա հնարավորության կտա Ցեղասպանության հարյուրամյա տարելիցին ևս մեկ անգամ աշխարհից պահանջել դատապարտել այդ ոճրագործությունը:
Լուսանկարը` PanARMENIAN Photo-ի