Այսօր Արարատյան հայրապետական թեմն իրականացրեց «Մենք մեր զինվորի կողքին ենք» խորագրով բարեգործական ծրագիր, որի շրջանակներում պաշտպանության նախարարության սոցիալական բաժնի տրամադրած ցանկով Կենտրոն համայնքի՝ բանակում երկու-երեք զինծառայող ունեցող 24 ընտանիքի և զոհված զինծառայողների հարազատներին դրամական օգնություն տրամադրվեց:
Զոհված զինծառայողների ընտանիքներին հատկացվեց 350 հազար դրամ, հաշմանդամություն ունեցող զինվորներին՝ 200 հազար, 3 զինծառայող ունեցողներին՝ 180 հազար, իսկ 2 զինծառայող ունեցողներին՝ 100 հազարական դրամներ։
Ծրագիրը մեկնարկել էր դեռևս ձմռանը, երբ Ս. Սարգիս զորավարի տոնի առթիվ փետրվարի 15-ին տոնական միջոցառումների ու զորամաս այցելությունների հետ մեկտեղ կազմակերպվել էր բարեգործական ճաշ, որի ընթացքում հանգանակվել էր 50 միլիոն դրամ, որը և այսօր բաշխվեց զինծառայողների ընտանիքներին:
Միջոցառման ժամանակ նշվեց, որ ծրագիրը շարունակական բնույթ է կրելու, և հաջորդ անգամ հանգանակված գումարը հատկացվելու է բանակում տարբեր իրավիճակներում վիրավորված զինծառայողներին՝ նրանց հետագա բուժումը կազմակերպելու նպատակով:
Միջոցառմանը ներկա պաշտպանության նախարար Սեյրան Օհանյանը կարևորեց «Մենք մեր զինվորի կողքին ենք» ծրագիրը, որն ապահովում է բանակ-հասարակություն կապը:
«Մենք շատ բարձր ենք գնահատում այս ծրագրի իրականացման գաղափարը: Նմանատիպ ծրագրերը յուրահատուկ խորհուրդ են հաղորդում՝ զինվորի կողքին լինելու: Մոտ լինել բանակին՝ նշանակում է անընդհատ ապրել բանակով: Եվ այդ իմաստով շատ կարևոր է մեր հոգևոր եղբայրների աջակցությունը»,- ընդգծեց նախարարը:
Լուսանկարը` PAN Photo-ի