«Կարծում եմ, որ այն տեղեկատվությունը, որը կա պաշտպանության նախարարության ու նաև տարբեր ԶԼՄ-ների կողմից, բնութագրում է այն իրականությունը, որ եղել է: Դիվերսիոն հետախուզական գործունեություն են ծավալել, ընդ որում՝ դիվերսիոն հետախուզական գործունեության մեջ հակառակորդի բանակի ղեկավարությունը նաև օգտագործում է հանցավոր խմբերի, որոնք ծանոթ են այդ տարածաշրջանին և նաև մեր օրենքների համաձայն հանցագործություն են կատարել: ԼՂՀ իրավապահ մարմիններն այսօր այդ խնդրի շուրջ քրեական գործ են հարուցել, և նրանք պատասխան կտան և՛ մեր օրենքների, և՛ միջազգային նորմերի պահանջների համաձայն»,- այսօր լրագրողների հետ զրույցում անդրադառնալով նախօրեին իրականացված դիվերսիոն գործողություններին՝ ասաց պաշտպանության նախարար Սեյրան Օհանյանը:
Նախարարը, անդրադառնալով տարբեր ազատամարտիկների հնչեցրած կարծիքին, թե նրանք բնավ էլ դիվերսանտներ չեն եղել և 3 տարի Հայաստանում առևտրով են զբաղվել, ասաց. «Այդպիսի տեղեկություններ մենք չունենք: Այսօր շատ-շատ անհատներ,- և ցավալի է, որ նրանց մեջ կան նաև մեր մարտական ընկերները,- փորձում են գնահատականներ տալ և ասել, որ, ասենք, ծառայությունը թերի է կազմակերպված: Նրանք են ասում նաև, ովքեր եղել են մեր սահմանագծի տարբեր հատվածներում, մանավանդ Քարվաճառում, որտեղ ԼՂՀ ՊԲ զորքերը հերթապահություն են իրականացնում, լեռնաանտառային պայմանները հնարավորություն չեն ստեղծում ամբողջությամբ փակել: Այդպիսի դեպքեր միշտ էլ եղել են, և ընդհակառակը՝ մենք այսօր փառք պետք է տանք մեր զինվորներին, ովքեր կարողացել են հայտնաբերել, վնասազերծել, մեկ հոգու ոչնչացնել և երկու հոգու գերեվարել»:
Ինչ վերաբերում է նրանց դիվերսանտ չլինելուն՝ պաշտպանության նախարարը հորդորեց, որ յուրաքանչյուր ոլորտի վերաբերյալ համապատասխան մասնագետը, փորձագետները գնահատական տան: «Մենք ասել ենք՝ հստակ է, որ եղել է դիվերսիոն հարձակում»,- ասաց նա:
Հարցին ի պատասխան, թե ինչո՞ւ է ակտիվացել Ադրբեջանը, նախարարը նկատեց. «Ադրբեջանը միշտ էլ փորձել է ակտիվ լինել, միշտ էլ փորձել է լարվածություն ստեղծել առաջին գծում՝ դրանով փորձելով ազդել այն կառույցների վրա, ովքեր զբաղվում են Ղարաբաղյան խնդրով՝ չհասկանալով, որ ՀՀ-ն և ԼՂՀ-ն երբեք չեն ուզում երկրորդ անգամ պարտադրված վիճակում լինել: Բայց ես ասում եմ, որ երկխոսությունն է այն միակ ճանապարհը, որով մենք կարող ենք ԼՂՀ կարգավորման խնդիրը խաղաղ ճանապարհով հասցնել մինչև վերջ»:
Նախարարը անդրադառնալով օրերս անհետացած 17-ամյա պատանու դեպքին՝ կարծիք հայտնեց, որ հնարավոր է՝ քրեական գործի ընթացքում պարզվի, որ դիվերսիոն խմբի անդամները կապված լինեն երիտասարդի անհետացման հետ: «Քեական գործը ամեն ինչ կպարզի»,-ասաց նա:
Մանրամասները՝ տեսանյութում: