Եվրոպան թույլ չի տա պատերազմ Ադրբեջանի ու Հայաստանի միջև՝ ադրբեջանական էներգակիրների պատճառով: «Առաջին լրատվական»-ի հետ զրույցում ասաց Ռազմական կանխատեսման կենտրոնի տնօրեն, ռուսաստանցի ռազմական փորձագետ Անատոլի Ցիգանոկը` անդրադառնալով հայ-ադրբեջանական և ղարաբաղա-ադրբեջանական շփման գծում առաջացած լարվածությանն ու ադրբեջանական դիվերսիոն հարձակումներին:
Ռուսաստանցի ռազմական փորձագետն ասաց, որ 1994-ի մայիսյան անժամկետ հրադադարով, որը ստորագրեցին Բաքուն, Ստեփանակերտը և Երևանը, դրվեց Ադրբեջանի և Հայաստանի միջև ռազմական սադրանքների հիմքը: Հենց այս համաձայնագրից հետո սկսվեցին սադրանքներն ու նման գործողությունները, ի դեպ՝ ոչ միայն ադրբեջանական, այլև հայաստանյան կողմից: Ըստ նրա՝ հրադադարի հաստատման առաջին իսկ օրվանից խախտվել են բոլոր պայմանավորվածությունները, բայց չեն եղել ռազմական գործողություններ, քանի որ ներկայումս դրանք ձեռնտու չեն ոչ հակամարտող կողմերին, ոչ էլ գերտերություններին, այդ թվում՝ Ռուսաստանին, Արևմուտքին: Ցիգանոկի համոզմամբ՝ տարածաշրջանին պատերազմ չի սպառնում:
«Հասկանալի է, որ Ադրբեջանի ռազմական բյուջեն ավելի է Հայաստանի բյուջեից, հասկանալի է, որ վերջին 6-7 տարիների ընթացքում Ադրբեջանը փորձել է ձեռք բերել ժամանակակից սպառազինություն, ռազմական մրցավազք է սկսվել հակամարտող կողմերի միջև, բայց միևնույն է՝ պատերազմ չի լինի:
Ես ենթադրում եմ, որ Ադրբեջանի ակտիվացումը պայմանավորված է նրանով, որ Ռուսաստանը զբաղված է Ուկրաինայով, բոլորը հստակ հասկանում են, որ Ռուսաստանի զինված ուժերը գտնվում են մարտական պատրաստականության մեջ՝ Ուկրաինայի դեպքում: Ոչ մի ռազմական գործողություն չի լինի, որովհետև ոչ մեկը թույլ չի տա այդտեղ պատերազմել: Պատերազմական գործողություններ չեն սկսվի նաև, քանի որ Եվրոպայի համար դեռ պարզ չէ՝ Ռուսաստանից գազ կստացվի՞, թե՞ ոչ, իսկ Ադրբեջանը՝ Ռուսաստանից հետո, Եվրոպա էներգակիրների հաջորդ մատակարարներից մեկն է: Եվրոպան թույլ չի տա այդտեղ պատերազմ սկսել:
Պատերազմի չվերսկսման պատճառներից մեկն էլ կապված է Աֆղանստանի հարցի հետ: Դրանք սադրանքներ են շփման գծում, իսկ դա այս հակամարտության համար բնականոն երևույթ է դարձել: Դա պատերազմի վերսկսման հետ կապ չունի: Ադրբեջանի համար կարևոր է, որ պատերազմ չսկսվի, բայց դրա վերսկսման վտանգը կարող է զգալի լինել նման գործողությունների միջոցով»,- ասաց Ցիգանոկը:
