Նախօրեին ՌԴ վարչապետ Դմիտրի Մեդվեդևի և ՀՀ վարչապետ Հովիկ Աբրահամյանի ներկայությամբ Ռուսաստանի և Հայաստանի Միգրացիոն ծառայությունների ղեկավարները ստորագրել են «Ռուսաստանի Դաշնության քաղաքացիների՝ Հայաստանի Հանրապետությունում գտնվելու կարգի և Ռուսաստանի տարածքում Հայաստանի քաղաքացիների գտնվելու կարգի մասին» համաձայնագիրը:
Ըստ փաստաթղթի, Ռուսաստանում ժամանակավորապես գտնվող Հայաստանի քաղաքացիները այդ երկիր մուտք գործելու ժամանակ իրավասու մարմիններում գրանցվելու պարտադրանքից 30 օրով ազատվում են:
Միևնույն ժամանակ նրանք պարտավոր են ժամանումից 30 օր անց գրանցվել:
Հիշեցնենք, որ «Ռուսաստանում օտարերկրյա քաղաքացիների եւ քաղաքացիություն չունեցող անձանց միգրացիոն գրանցման մասին» դաշնային օրենքն օտարերկրացիներից պահանջում է, որ աշխատանքային 7 օրվա ընթացքում գրանցվեն իրավասու մարմիններում՝ ըստ բնակության վայրի:
Հիշեցնենք նաև, որ այս օրենքը Ռուսաստանում գործում է այս տարվա հունվարի մեկից, իսկ հայաստանցի միգրանտների համար արտոնություններ սահմանվցին միայն այն բանից հետո, երբ Հայաստան ժամանեց ՌԴ միգրացիոն ծառայության ղեկավարը, այնուհետև հայ-ռուսական միջխորհրդարանական խմբի հանդիպման ժամանակ նման խնդրանքով դիմեց հայկական կողմը՝ հանձին ԱԺ փոխնախագահ Հերմինե Նաղդալյանի:
«Առաջին լրատվականը» ՀՀ միգրացիոն ծառայության ղեկավար Գագիկ Եգանյանից տեղեկացավ նաև, որ Հայաստանին տրվել են այն նույն արտոնությունները, ինչ ՄՄ անդամ երկիր Ղազախստանին, իսկ ՄՄ մեկ այլ անդամ երկիր Բելառուսի դեպքում արտոնություններ պետք էլ չէին, նրանց համար գործում է այն նույն ռեժիմը, ինչ Ռուսաստանի քաղաքացիների համար՝ որպես միութենական երկիր:
Ստորագրված այս համաձայնագրով չի լուծվում, սակայն, այն բոլոր ՀՀ քաղաքացիների խնդիրը, որոնք հայտնվել են «սև ցուցակում», այսինքն՝ արդեն իսկ խախտել են Ռուսաստանի միգրացիոն օրենքը: Իսկ այդ քաղաքացիները թվով 170․000-ն են:
Ժողովրդագրագետ Ռուբեն Եգանյանի կարծիքով՝ ՌԴ միգրացիայի հետ կապված խնդիրներն ամբողջական և արմատական լուծում չեն ստացել:
Եգանյանը նշեց նաև, որ կա շուրջ 200 հազար հայ միգրանտ, որոնցից 60 հազարը դիմել են ՌԴ միգրացիոն ծառայություն՝ արգելքը հանելու խնդրանքով, բայց մինչ օրս այդ թիվը փոփոխության չի ենթարկվել: Նրաց մի մասը որոշել է կամ վերադառնալ, կամ մնալ ու հայտնի ճանապարհով խնդիրը լուծել Ռուսաստանում:
