Ադրբեջանի խնդիրը մոտ ապագայում «բլիցկրիգ» իրականացնելն է: «Առաջին լրատվական»-ի հետ զրույցում ասաց Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն՝ անդրադառնալով ադրբեջանական կողմի իրականացրած դիվերսիոն գործողություններին ու պատերազմի վերսկսման մասին խոսակցություններին:
Մեր հարցին՝ ինչո՞ւ է վերջին շրջանում Ադրբեջանն ինտենսիվացրել դիվերսիոն հարձակումները հայ-ադրբեջանական, ղարաբաղա-ադրբեջանական հակամարտ զորքերի շփման գծի բոլոր ուղղություններով՝ պատասխանեց, որ հստակ չի կարելի ասել, թե որ կողմն է կազմակերպում դիվերսիոն գործողություններն ու առաջինը լարում իրավիճակը հայ-ադրբեջանական հակամարտ զորքերի շփման գծում: Նրա կարծիքով՝ նույնիսկ այս հարցի քննարկումը քաղաքական նոր բարդություններ կառաջացնի, քանի որ վերջին շրջանում գլուխ բարձրացրած լարվածության գլխավոր պատճառն այլ տեղում է: Ահմեդօղլուի համոզմամբ՝ եթե դիվանագիտությունը չի աշխատում, բանակցություններ չկան, սկզբունքների շուրջ կողմերը չեն կարողանում փոխըմբռնում ձևավորել, հակամարտության կարգավորման այլ ելք չի մնում, քան ռազմական գործողությունները:
«Նույնիսկ Սերժ Սարգսյանը, որը մինչ նախագահի աթոռը զբաղեցնելն աշխատել է շատ պատասխանատու պաշտոններում, պնդում է, որ չի հասկանում փաստաթղթերից: Կարծում եմ, որ պատճառը երևի թե Մադրիդյան սկզբունքների հանդեպ կարգավորման տարբեր մոտեցումներն են, բայց թե ինչ չհասկացվածություն կարող է լինել՝ ես չգիտեմ»,- ասաց փորձագետը:
Վերջինիս համոզմամբ՝ պատերազմի վերսկսման մասին խոսելն ավելորդ է, քանի որ այն արդեն սկսվել է: Պարզապես, նրա խոսքով, ադրբեջանական կողմին մնացել է հստակեցնել «բլիցկրիգի» մեկնարկը:
«Ամեն օր ստացվում են տեղեկություններ երկու կողմերում զոհերի մասին, դիվերսիոն գործողություններ, կրակահերթեր, էլ ինչպե՞ս պետք է պատերազմը լինի, էլ ի՞նչ պետք է լինի որպես պատերազմի մեկնարկի ազդանշան: Ներկայումս դիվերսիոն գործողություններով Ադրբեջանը ստուգում է հակառակորդի սթափությունն ու աչալրջությունը, ադրբեջանական կողմը մոտ ապագայում արդեն կհստակեցնի «բլիցկրիգի» ամսաթիվը: Ադրբեջանը բացի պատերազմական գործողություններին պատրաստվելուց այլ ելք չունի, չկա դրան այլընտրանք: Մեր տեղեկություններով՝ հայկական կողմը չհամաձայնեց Փարիզում հանդիպում ունենալ նախագահների մակարդակով, իսկ նախագահ Սերժ Սարգսյանը եղավ այս օրերին Ուրուգվայում, մի փոքր համաձայնագիր ստորագրեցին, որի երեք կետը ԼՂ-ին վերաբերող, այսինքն՝ այսօր Հայաստանը առաջ է մղում ԼՂ անկախության ճանաչման գործընթացը, բայց դա Ադրբեջանը տեսնում է: Դրա փոխարեն՝ Սերժ Սարգսյանը պետք է զբաղվեր ԼՂ հակամարտության իրական կարգավորման գործընթացով»,- նման կարծիք հայտնեց Մուբարիզ Ահմեդօղլուն: