Օրերս Արևելյան Գործընկերության անդամ երեք պետություններ՝ Վրաստանը, Մոլդովան և Ուկրաինան, Եվրոպական միության հետ ստորագրեցին Ասոցացման համաձայնագիր, այդ թվում՝ Խոր և համապարփակ ազատ առևտրի գոտու պայմանագիր՝ Հայաստանին, Բելառուսին և Ադրբեջանին թողնելով ինտեգրացիոն զարգացման շատ ավելի ցածր մակարդակում: Սակայն տեսակետներ են հնչում, որ այս երկրները դատապարտված են լինել եվրոպական զարգացման գոտում:
«Առաջին լրատվական»-ի հետ զրույցում ասաց Վրաստանի ռազմավարական հետազոտությունների կենտրոնի տնօրեն, Վրաստանի ԱԳ նախկին նախարար Իրակլի Մենագարիշվիլին հույս հայտնեց, որ կշարունակվի Արևելյան գործընկերության մյուս երեք երկրների՝ Հայաստանի, Ադրբեջանի ու Բելառուսի համագործակցությունն ու համատեղ ծրագրերը Եվրոպական միության հետ այն բանից հետո, երբ Մոլդովան, Ուկրաինան ու Վրաստանը ստորագրեցին Ասոցացման համաձայնագիր ԵՄ-ի հետ: Թեև պաշտոնապես, ըստ նրա, որևէ նման որոշում չի հրապարակվել:
«Բայց ես հույս ունեմ, որ Արևելյան գործընկերությունը կպահպանվի՝ որպես համագործակցություն հետսովետական երկրների, որոնք ունեն եվրոպական հավակնություններ, չնայած այն բանին, որ ոմանք ընտրել են պրոռուսական զարգացման ուղի: Վրաստանն իր ռազմավարական զարգացման որոշումը կայացրել է դեռևս այս դարի սկզբում, այսինքն՝ շատ ու շատ ավելի վաղ: Դրանից հետո Վրաստանը չի փոխել իր ընտրած ուղին, և այդ ռազմավարական զարգացման ուղին պահպանվել է այս տարիների ընթացքում:
Մեզ թվում է, որ մենք ճիշտ ճանապարհին ենք, թեև մենք նաև մեր հարևանների համար ենք ցանկանում նույն հեռանկարը: Որևէ մեկը չի պատրաստվում մյուսի հետ մրցակցել, եթե Վրաստանի օրինակը որևէ մեկին կօգնի ընտրել այն ուղին, որն առավել արդյունավետ է, մենք միայն ուրախ կլինենք:
Թեև յուրաքանչյուր երկիր իր տեսլականն ունի իր ապագայի վերաբերյալ, Հարավային Կովկասի առանձին մասերը թեև այսօր, տարածաշրջանում տարբեր գործոններով պայմանավորված, շարժվում են տարբեր ուղղություններով, կարևոր է, որպեսզի տարածաշրջանային միասնականությունը պահպանվի՝ չնայած այն ընտրությանը, որը կայացրել են երկրները»,- ասաց նախկին նախարարը՝ շարունակելով, թե չի կարող բացառել, որ ԱլԳ այդ երկրները կգնան եվրոպական զարգացման ճանապարհով: Նա ընդգծեց, որ Վրաստանի կայացրած որոշումն ավելի հեռանկարային է և կարող է վարակիչ դառնալ տարածաշրջանի համար: Թեև նա նաև ասաց, որ մեծ հաշվով, ապագան ցույց կտա, թե ով էր ճիշտ:
