Այսօր «Հիմա» երիտասարդական նախաձեռնությունը կառավարության շենքի մոտ բողոքի ակցիա է կազմակերպել, որի ընթացքում բարձրաձայնում էին Հայաստանում գործող այն միգրացիոն ծառայությունների մասին, որոնց միջոցով հայաթափվում է Հայաստանը:
Երիտասարդները պարզել էին հետևյալ բովանդակությամբ պաստառներ ` «Հերիք է լցնենք ռուսական աքսորավայրերը», «Ո՛չ պլանավորված հայաթափմանը, «Կառավարությանը` Սիբիր», «Հայաստանն առանց հայերի (Գոլիցին, Թալեաթ փաշա, ՀՀ կառավարություն)»:
«Հիմա» նախաձեռնող խմբի հաղորդագրության մեջ մասնավորապես ասվում է, որ ՀՀ կառավարությունը գտել է գործազրկության հարցը լուծելու ամենակարճ ուղին՝ Հայաստանի հայաթափմանը նպաստելը, գաղտնիք չէ, որ Հայաստանի տարբեր մարզերում և Երևանում ստեղծվել են ինչպես Ռուսաստանի, այնպես էլ ՀՀ աշխատանքի և սոցիալական հարցերի նախարարության հովանու ներքո գործող միգրացիոն կենտրոններ, որոնց մոտ երկրից հեռանալ ցանկացող ՀՀ քաղաքացիների հերթեր են գոյանում:
«Հիմա»-ի նախաձեռնողները կառավարությունից պահանջում են իրենց իսկ նախաձեռնությանը նպաստել սեփական օրինակով՝ անմիջապես պատրաստել փաստաթղթեր և դիմել մոտակա միգրացիոն կենտրոն արտագնա աշխատանքի մեկնելու թույլտվություն ստանալու համար: Նախաձեռնող խմբի անդամներից Հակոբ Արշակյանի համոզմամբ, ներկայիս կառավարությունը այդ միգրացիոն ծառայության միջոցով պետք է մեկնի Հայաստանից, քանի որ իրականացնում է ոչ հայանպաստ գործունեություն:
Ավելին, երիտասարդները նույնիսկ դասակարգել էին, թե որ նախարարը Ռուսաստանի որ մարզ մեկնի: Օրինակ՝ վարչապետ Սարգսյանի մեկնելու վայրը Կուկուևո գյուղն է, Արմեն Աշոտյանինը` Սիկտիվկար քաղաքը: Նախարարներին առաջարկվող բնակավայրերի թվում էին նաև Մալոե Լոխովոն, Բուխալովոն, Վերխնեե Զաչատիեն, Կակինոն, Կոզյավկինոն, Կույոկնուլոն և այլն: Այս տեղանունները ընդգրկված էին ռուսական միգրացիոն ծառայության տրամադրած դիմումի ձևում, իսկ որպես ներկայիս բնակավայր նշված էր՝ Форпост Армения:
Ի դեպ, երիտասարդներին մոտեցան ոստիկանները եւ հետաքրքրվեցին՝ նրանք կառավարությանը կամ քաղաքապետարանին իրազեկե՞լ են իրենց ակցիայի մասին, ինչին ի պատասխան երիտասարդները նշեցին, որ դրա անհրաժեշտությունը չկա, քանի որ իրենց թիվը չի անցնում 100-ից: