Այսօր Հայաստանի ԱԳՆ-ում ՀՀ ԱԳ նախարար Էդվարդ Նալբանդյանի և Երևան ժամանած ԵԱՀԿ գործող նախագահ, Լիտվայի արտգործնախարար Աուդրոնիուս Աժուբալիսի միջև կայացած հանդիպումից հետո կայացավ համատեղ մամուլիս ասուլիս:
Ողջունելով հյուրին՝ Էդվարդ Նալբանդյանը հիշեցրեց, որ Լիտվան առաջին երկիրն էր, որը 1991 թ. ճանաչեց Հայաստանի անկախությունը, նշեց, որ երկկողմ հարաբերությունները գտնվում են բարձր մակարդակի վրա, և հույս հայտնեց, որ Լիտվայի ԱԳ նախարարի այցելությունը, ինչպես նաև մարտի սկզբին Լիտվային նախագահի ակնկալվող այցելությունը կնպաստեն երկկողմ հարաբերությունների զարգացմանն ու ամրապնդմանը: Նախորդ օրվանից սկսված քննարկումների շարքում տարածաշրջանային, միջազգային հարցեր են եղել:
Է.Նալբանդյանը ասաց, որ անդրադարձ է եղել ղարաբաղյան հակամարտության կարգավորմանը. «Ես նշեցի, որ Հայաստանի դիրքորոշումը միանգամայն համահունչ է այն հայտարարություններին, որ արվել են ԵԱՀԿ ՄԽ համանախագահող երկրների նախագահների կողմից` լ’Աքվիլայում և Մուսկոկայում: Մենք համակարծիք ենք, որ ԼՂ հիմնախնդրի կարգավորումը պետք է լինի բանակցային խաղաղ ճանապարհով, և խաղաղ կարգավորմանը այլընտրանք գոյություն չունի»:
Նալբանդյանը Աժուբալիսի` դիպուկարահարների հետքաշման կոչին ևս անդրադարձավ` նկատելով, որ վերջին երկու տարիներին միջազգային տարբեր ամբիոններից բազմաթիվ անգամ կոչեր են հնչել դուրս բերել դիպուկահարներին շփման գծից, և թե՛ Հայաստանը, թե՛ ԼՂ-ն ընդունել են դիպուկահարների դուրս բերման առաջարկը:
«Հայաստանն ընդունել է նաև հրադադարի ռեժիմի ամրապնդման, ինչպես նաև հետաքննության անցկացման առաջարկները: Մենք նաև կողմ ենք համաձայնության գալ ուժի չկիրառման վերաբերյալ: Վերջին շրջանում կցանկանայի հիշեցնել, որ թե՛ Սոչիից առաջ, թե՛ Սոչիից հետո և անգամ երեկ, երբ տարածաշրջանում են գտնվում եռանախագահող երկրների ներկայացուցիչները, գործող նախագահը, ադրբեջանական դիպուկահարները ևս մեկ զինվորական են սպանել ԼՂ-ում: Մեծ աղմուկ են բարձրացնում առանց հիմնավոր պատճառների ինը տարեկան երեխայի մահվան համար, որն անգամ տեխնիկապես անհնար էր, որ լիներ ԼՂ-ի կողմից: Այս բոլոր քայլերն ուղղված են տարածաշրջանում լարվածության մեծացմանը: Մենք կողմ ենք, որ Սոչիում ստեղծված դրական մթնոլորտի հիման վրա բանակցությունները շարունակվեն դեպի հիմնախնդրի կարգավորում»,- ասաց Նալբանդյանը:
«Հայ-ռուսական դաշնակցային հարաբերություններն այնպիսի ամուր հիմքերի վրա են դրված, որ այլ երկրի ղեկավարի այցելությունը Մոսկվա չի կարող վատ ազդեցություն ունենալ մեր հարաբերությունների վրա»,- նշեց Է.Նալբանդյանը` պատասխանելով ռուս-թուրքական հարաբերությունների սերտացման, դրանց շուրջ հայ հասարակության մեջ տիրող տրամադրությունների մասին և օրերս Թուրքիայի վարչապետ Ռ.Էրդողանի` ՌԴ կատարած այցին:
