Մարտի 16-ին Շվեյցարիայի Համադաշնության խորհրդարանում հայ-շվեյցարական բարեկամության խորհրդարանական խմբի նախաձեռնությամբ տեղի ունեցան քննարկումներ Լեռնային Ղարաբաղի հակամարտության վերաբերյալ:
Քննարկումներին մասնակցում էին Շվեյցարիայի խորհրդարանի հայ-շվեյցարական բարեկամության խորհրդարանական խմբի համանախագահներ Ուելի Լեոնբերգերը և Դոմինիկ Դը Բումանը, բարեկամության խմբի անդամները, գլխավոր քարտուղար Սարգիս Շահինյանը, այլ խորհրդականներ, խորհրդարանի աշխատակազմի և Շվեյցարիայի արտաքին գործերի դաշնային դեպարտամենտի քաղաքական տնօրինության ներկայացուցիչներ, Շվեյցարիայում ՀՀ դեսպանության և Ֆրանսիայում Լեռնային Ղարաբաղի ներկայացուցչության աշխատակիցները, ինչպես նաև հասարակական կազմակերպությունների ներկայացուցիչներ:
Քննարկումները բացելով` հայ-շվեյցարական խորհրդարանական խմբի նախագահ Դոմինիկ դե Բումանը նշեց, որ խումբը 2008թ.-ի հունիսին Հայաստան կատարած այցի ընթացքում այցելել է նաև Լեռնային Ղարաբաղ, և որ ներկայիս քննարկումները նպատակ ունեն նաև հնարավորինս տեղեկացնելու շվեյցարական քաղաքական շրջանակներին Հայաստանի համար կենսական կարևորության խնդիրներից մեկի` Լեռնային Ղարաբաղի հակամարտության և դրա աշխարհաքաղաքական հետևանքների ու խնդիրների մասին:
Քննարկումներին «Լեռնային Ղարաբաղի հակամարտության ժամանակագրությունը և մարդու իրավունքներին առնչվող հարցեր», «Ժողովուրդների ինքնորոշման իրավունքի և տարածքային ամբողջականության սկզբունքների կոնցեպտները», «Լեռնային Ղարաբաղի ինքնորոշման իրավունքի վիճելի հարցերը» և «Լեռնային Ղարաբաղի հակամարտության հեռանկարները. հնարավոր զարգացումներ և դրանց քաղաքական հետևանքները» թեմաներով զեկույցներով հանդես եկան փորձագետներ Թեսա Հոֆմանը, Ժերար Գերգերյանը, Օտտո Լյուխտերհարդը և Ժյուլիեն Զարաֆյանը:
Զեկույցներին հաջորդեցին մասնակիցների հետ հարցուպատասխանի ձևաչափով քննարկումներ:
Քննարկման մասնակիցներին բաժանվեցին հայ-շվեյցարական խորհրդարանական խմբի ջանքերով պատրաստված «Լեռնային Ղարաբաղ. մարդու իրավունքներ, միջազգային իրավունք և աշխարհաքաղաքական ասպեկտներ» և «Ջուղայի ավերումը և Նախիջևանի հայկական մշակութային ժառանգության ոչնչացումը» խորագրով բրոշյուրներ:
