Աշխատանքային այցով Երևանում գտնվող Լիոնի քաղաքապետի տեղակալ Ժորժ Կեպենեկյանը հանդիպել է Երևանի քաղաքապետ Կարեն Կարապետյանի հետ: Հանդիպման ընթացքում քննարկվել են Լիոնի և Երևանի քաղաքապետարանների միջև կնքած 2008–2011թթ.-ի համագործակցության ծրագրի հետագա ընթացքի և շարունակականության ապահովմանն առնչվող կապված հարցեր:
Գնահատելով Լիոնի քաղաքապետարանի մասնակցությունը Երևանի ծրագրերում, Կարեն Կարապետյանը համոզմունք է հայտնել, որ երկու քաղաքների միջև համագործակցության լայն դաշտ կա և, հաշվի առնելով առկա ներուժի իրացման հնարավորությունը, առաջարկել է աշխատանքային քննարկումների արդյունքում փոխշահավետ ծրագրեր մշակել:
Ներկայացնելով մայրաքաղաքի օպտիմալ կառավարման մոդելի ձևավորման շուրջ իր մոտեցումները, քաղաքապետը նշել է նաև այն ուղղություններն ու ոլորտները, որոնք կարող են հետաքրքրություն ներկայացնել պոտենցիալ ներդրողների համար:
Լիոնի փոխքաղաքապետն իր հերթին նշել է, որ Երևանի և Լիոնի միջև ձևավորված կապը երկարամյա պատմություն ունի, ընդգծելով նաև փաստը, որ Լիոնում հայկական մեծ համայնք է գործում: Ժորժ Կեպենեկյանը Լիոնի քաղաքային իշխանության անունից պատրաստակամություն է հայտնել շարունակել համագործակցությունը, որը կլինի երկարատև և նոր շունչ կհաղորդի երկկողմ շփումներին: Անդրադառնալով Լիոնի կառվարման մոդելի արդյունավետությանն ու փորձին, Ժորժ Կեպենեկյանն ասել է, որ օպտիմալ կառավարման և նպատակների իրականացման համար շարժիչ ուժ է հանդիսացել մասնավոր ընկերությունների ակտիվ ներգրավվածությունը քաղաքի կառավարման աշխատանքներում:
Ժորժ Կեպենեկյանը քաղաքապետին է ներկայացրել Լիոնի և Երևանի քաղաքապետարանների միջև հաստատված համագործակցության շրջանակում իրականացվող ծրագիրը, համաձայն որի Երևանի Էրեբունի վարչական շրջանում «Լիոնի այգու» հիմնադրման աշխատանքներ են ընթանում: Այգում հիմնական աշխատանքները մոտենում են ավարտին։ Նախնական պայմանավորվածության համաձայն, «Լիոնի այգու» բացման արարողությունը տեղի կունենա ընթացիկ տարեվերջին` Լիոնի քաղաքապետ Ժերար Կոլոմբի պաշտոնական այցի ժամանակ։
Համագործակցության ընդլայնման հեռանկարների և կապերի սերտացման համատեքստում կողմերը պայմանավորվել են նաև երկու քաղաքների քաղաքապետարանների կառուցվածքային ստորաբաժանումների և գործառույթների մասով փորձի փոխանակման ծրագրեր իրականացնել։
Երևանի քաղաքապետարան
