Շնորհակալություն հայտնելով համագործակցության և Հայաստանում ժողովրդավարության ամրապնդման գործում համազեկուցողների կատարած աշխատանքի համար` ԱԺ նախագահը կարևորեց նրանց գործադրած ջանքերը, որոնք միտված են աջակցել մեր երկրին ` հաղթահարելու բարեփոխումների գործընթացում առաջացած խնդիրները: Հովիկ Աբրահամյանը ողջունեց նոր համազեկուցող Աքսել Ֆիշերին և հաջողություններ մաղթեց իր պարտականությունների կատարման գործում:
Ջոն Պրեսկոտը բարձր գնահատեց Հայաստանում ընթացող բարեփոխումները և կարևորեց ԱԺ նախագահի դերը մարտի 1-ի իրադարձությունների հետևանքով ստեղծված իրավիճակից հետո արձանագրված առաջընթացի հարցում:
Համազեկուցողը նշեց, որ ԵԽԽՎ գարնանային նստաշրջանում կզեկուցվի Հայաստանում իրականացված բարեփոխումների և առաջընթացի մասին: Նա հատկապես կարևորեց հեռանկարային բարեփոխումները, որոնք ավելի գնահատելի են: Պարոն Պրեսկոտի կարծիքով անհրաժեշտ է, որ քննադատությունը տեղափոխվի խորհրդարան և խորհրդարանն է այն հարթակը, որտեղ պետք է լսելի լինեն տարբեր դիրքորոշում ունեցող անձանց դիրքորոշումները: Նա բարձր գնահատեց ԱԺ նախագահի ջանքերն այս ուղղությամբ, քանի որ պարոն Աբրահամյանը բազմիցս առաջարկել է ընդդիմությանը օգտագործել ԱԺ ամբիոնը իրենց տեսակետները ներկայացնելու համար:
Հանդիպման ընթացքում կողմերը անդրադարձան 2008 թվականի մարտի 1-2-ի իրադարձությունների հետո ազատազրկված անձանց հարցին, ընտրական օրնեսգրքի բարեփոխումներին, ոստիկանության և դատական համակարգերում ընթացող բարեփոխումներին, ՀՌԱՀ ձևավորման կարգին: Պարոն Աբրահամյանը նշեց, որ բարեփոխված և հանրության դատին ներկայացված ընտրական օրենսգիրքը անցել է քննարկումների երկարատև ուղի և լսելի են եղել բոլոր այն անձանց ձայները և առաջարկները, ովքեր ցանկություն են ունեցել իրենց ներդրումն ունենալ այդ գործընթացում:
ԱԺ նախագահը վերահաստատեց ՀՀ իշխանությունների կամքն և պատրաստակամությունը իրականացնել անկողմնակալ և թափանցիկ հետաքննություն մարտի 1-2-ի դեպքերի առնչությամբ` ընդգծելով, որ բոլորի ցանկությունն է իմանալ ճշմարտությունը:
Հովիկ Աբրահամյանը իր մտահոգությունը արտահայտեց ԵԽԽՎ ԼՂ հարցերով ժամանակավոր հանձնաժողովի աշխատանքների վերսկսման կապակցությամբ` նշելով, որ այն կխոչընդոտի ԵԱՀԿ Մինսկի խմբի աշխատանքներին: Պարոն Պրեսկոտը նույնպես մտահոգություն հայտնեց և նշեց, որ պետք է դրսևորել զգուշավորություն, որպեսզի հետ քայլ չարձանագրվի:
Վերջում ԱԺ նախագահ Հովիկ Աբրահամյանը շեշտեց, որ Հայաստանի Նախագահը, խորհրդարանը և կառավարությունը հաստատակամ են ժողովրդավարական բաերփոխումները ավարտին հասցնելու գործում:
Հանդիպման ընթացքում քննարկվեցին այլ հարցեր ևս:
ՀՀ ԱԺ հասարակայնության և տեղեկատվության միջոցների հետ կապերի վարչություն