Մայիսի 29-ին Աստանայում Մաքսային միության անդամ երկրները՝ Ռուսաստանը, Ղազախստանը և Բելառուսը, ստորագրել են Եվրասիական տնտեսական միության ստեղծման մասին պայմանագիրը:
Ղազախստանի նախագահ Նուրսուլթան Նազարբաևը Եվրասիական տնտեսական խորհրդի նիստում ընթերցեց Ադրբեջանի նախագահ Իլհամ Ալիևի նամակը՝ ուղղված Հայաստանին:
Լեռնային Ղարաբաղի Հանրապետության արտաքին գործերի նախկին նախարար Արման Մելիքյանից խնդրեցինք մանրամասնել, թե ի՞նչ է նշանակում այս հայտարարությունը, և ո՞րը պետք է լինի Հայաստանի անելիքը:
Մելիքյանն «Առաջին լրատվական»-ի հետ զրույցում ասաց, որ Ադրբեջանի նախագահը Ռուսաստանի, Ղազախստանի ու Բելառուսի նախագահներին հորդորել է, որ Հայաստանի՝ ԵՏՄ անդամ դառնալը կատարվի այն նույն պայմաններով, ինչ պայմաններով որ Հայաստանը դարձել է Առևտրի համաշխարհային կազմակերպության անդամ, այսինքն՝ Հայաստանը պետք է անդամագրվի նորաստեղծ այս կազմակերպությանը այն սահմաններով, որոնք հենց ինքն էլ ճանաչել է իր պետական անկախությունը հռչակելիս:
«Կարող ենք արձանագրել, որ գոնե Հայաստանի Հանրապետության տարածքային ամբողջականության հարցում Ադրբեջանը այլակարծիք չէ ու տարածքային պահանջներ չունի»,- ասաց նա:
Մելիքյանն ընդգծեց, որ իրավական առումով Հայաստանը չի ճանաչել ո՛չ Արցախի անկախությունը, ո՛չ էլ նրա՝ ՀՀ-ի մաս կազմելը, ուստի չի էլ կարող պահանջ ներկայացնել իր գործընկերներին Հայաստանի տարածքում Արցախին ևս ներառելու վերաբերյալ. «Բայց սա դեռ հարցի մի կողմն է: Մյուս կողմից՝ Արցախն ունի սեփական իշխանություններ, և միայն նրանք են իրավասու որոշելու, թե երբ և որ կազմակերպությանն անդամագրվելու հայտ ներկայացնեն կամ չներկայացնեն: Միաժամանակ պետք է հասկանալի լինի նաև այն, որ Հայաստանին ԵՏՄ իրավահավասար անդամ տեսնելու անկեղծ ցանկություն կարող է ունենալ միայն Ռուսաստանը: Բանն այն է, որ յուրաքանչյուր անդամ-պետություն ունենալու է մեկ ձայնի իրավունք, և, հաշվի առնելով մեր ներքաղաքական արդի իրողությունները, կարելի է կանխատեսել, որ շնորհիվ ՀՀ անդամակցության՝ վիճահարույց հարցերի քվեարկությունների ժամանակ Ռուսաստանը իր զինանոցում, սեփական ձայնից բացի, կունենա նաև Հայաստանի գրեթե երաշխավորված ձայնը ևս»:
Նրա գնահատմամբ՝ ՀՀ անդամության հետաձգումը էապես չի ներազդի գործերի հետագա ընթացքի վրա:
Հարցին՝ չնայած այս խոչընդոտներին, իր կարծիքով՝ Հայաստանը կանդամակցի՞ Եվրասիական տնտեսական միությանը, Արման Մելիքյանը դրական պատասխան տվեց: