Լոռու մարզի Այգեհատ գյուղում գործադուլ է. չի աշխատում միակ պետական կառույցը` գյուղապետարանը: Գյուղի դպրոցում էլ զանգը չի հնչում. 20 աշակերտի ծնող երեխաներին արգելել է դպրոց հաճախել:
Սրանով, այգեհատցիներն իրենց բողոքն են արտահայտում գյուղատնտեսության ոլորտում կառավարության ընդունած մի որոշման դեմ, որով գյուղի ունեցած միակ` 131 հա Չալ կոչված արոտավայրը հատկացվում է հարեւան` Արդվի համայնքին:
Ըստ Այգեհատի գյուղապետ Արշակ Շահվերդյանի` դա արվում է մեկ միավոր դարձնելու նպատակով: Այսօր գյուղում 290 մարդ է ապրում: Միշա Շահվերդյանը եւ իր համագյուղացիները մտահոգված են իրենց ապագայով:
Շուրջ 300 գլուխ խոշոր եղջերավոր անասունները արոտավայր չեն ունենա, այնինչ այսօր այգեհատցիների ապրուստի միջոցը անասնապահությունն է:
«Ի՞նչ ենք անելու, էս անասուններին հարկադիր սպանդի ենք ենթարկելու: Էնա մեզ էլ քշեն գյուղից, պրծնենք, ի՞նչ են ուզում վերեւներում մեզանից: Ի՞նչով ենք պահելու մեր էրեխեքին»,-ասում են գյուղացիները:
Ռուդոլֆ պապն ասում է, որ իրենք չեն պատրաստվում իրենց համայնքին պատկանող հողը տալ հարեւան համայնքին: Նա չի կարծում թե սա հողերի միավորման համար է արվում:
«Էս գյուղն ինչ կա, 300-400 տարվա բան եմ ասում. էդ հողերը գյուղինն են, մենք ուրիշ արոտավայր չունենք, ո՞նց են մի տարում որոշել, որ էս գյուղին արոտավայր պետք չի, ախր չէ՞ որ մենք երկրորդը չունենք: Իմ պապական հողն է. հարեւանի ոտքը էնտեղ գործ չունի: «Մի կաթիլ մեղրի» պատմությունն է»,-ասում է նա:
Այգեհատցիների հետ անհանգիստ են նաեւ հարեւան արդվեցիները:
«Էդ մարդիկ, որ վերցնեն, մեր գյուղ էկող ճամփեն փակեն, ճի՞շտ չեն անի: Մենք գյուղտեխնիկա չունենք. իրանցից ենք բերում վար ու ցանք անում, բա էլ կտա՞ն»,-մտահոգվում է արդվեցի 75-ամյա Ռուբեն պապը:
Արդվիի գյուղապետ Սամվել Կիրակոսյանի խոսքով, իրենց այդ արոտավայրը բոլորովին պետք չէ:
«Մենք դրա երեք չափն ունենք, էդ մարդիկ իրավունք ունեն իրենց հողերի վրա, իսկ մեր գյուղացիներն ու ես անձամբ չեմ պատրաստվում նրանց զրկել այդ միակ արոտավայրից»,-ասում է գյուղապետը:
Այգեհատի գյուղապետ Արշակ Շահվերդյանն ասում է, որ այս հարցով բազմիցս դիմել է մարզպետարան` ներկայացնելով իրենց ունեցած համապատասխան քարտեզագրումներն ու գյուղացիների դժգոհությունները: Հարցը քննարկել է նաեւ տարածքային կառավարման նախարարի հետ, սակայն ոչ մի հուսադրող բան չկա:
«Ասում են` կարաք Արդվիի հետ երեք տարով պայմանագիր կնքեք, վարձակալությամբ օգտագործեք. ո՞նց կլինի: Կառավարության կողմից առաջարկված պայմանագրային վարձակալման տարբերակի հետ գյուղացիները ոչ մի դեպքում չեն համաձայնի: Ամբողջ գյուղը դեմ ա դրան: Հ
ետո մի խնդիր էլ կա: Նրանք ավելի շատ ոչխար ունեն, մերը կովեր են, ոչխարի արածած տեղը կովը չի արածում: Չգիտենք` սրա վերջը ինչ ա լինելու»,- ասաց Այգեհատի գյուղապետը:
