Օրերս Կարեն Դեմիրճյանի անվան մարզահամերգային համալիրում կայացավ Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի չորրորդ նիստը, որի ընթացքում Սերժ Սարգսյանը 2015թ. ապրիլի 24-ին Երևան հրավիրեց Թուրքիայի նախագահին ու բարձրաստիճան ղեկավարությանը: Սերժ Սարգսյանի հրավերքը բազում արձագանքներ է գտել ինչպես Թուրքիայի իշխանության, այնպես էլ փորձագիտական հանրության և քաղաքացիական հասարակության շրջանում: Քիչ չեն այնպիսիք, որոնք այն շատ ճիշտ քայլ են որակում:
«Առաջին լրատվական»-ի հետ զրույցում Թուրքիայի «Ռազմավարական հեռանկար» քաղաքական ինստիտուտի կովկասյան տարածաշրջանի փորձագետ Մեհմեդ Ֆատիհ Օզթարզուն անդրադարձավ ՀՀ նախագահ Սերժ Սարգսյանի հրավերին և հայ-թուրքական հարաբերությունների կարգավորման վերաբերյալ ելույթի այլ հատվածներին:
Նա նշեց, որ առաջին հերթին պետք է հասկանալ, թե ինչ ասել է Անկարայի պահանջ: Ըստ նրա՝ արխիվների բացումը, որի մասին խոսում է ՀՀ նախագահը, խնդիր չէ: Ըստ նրա՝ միակ խնդիրն այն է, որ երկու կողմերը չունեն որակավորված փորձագետներ, որոնք կկարողանան աշխատել պատմական փաստաթղթերի վրա:
«Այսպիսով, չկա որևէ հնարավորություն քննարկելու պատմական խնդիրները, և մենք չենք կարող ստեղծել պատմաբանների հանձնաժողով: Ես գնահատում եմ հայաստանյան կողմի նախաձեռնությունները թանգարանների և ինստիտուտների զարգացման ուղղությամբ: Ես տեսել եմ Մատենադարանը և շատ այլ թանգարաններ, և կարող եմ ասել, որ հայերը աշխատասեր են այս հարցում, քան թուրքերը տարածաշրջանային փորձագիտության հարցում: Ես հավատում եմ, որ սա նոր քայլ է դեպի կարգավորման գործընթաց, և կտեսնենք, թե ինչ կլինի»,- նշեց նա՝ հավելելով, որ դժվար է ասել՝ հրավերը կընդունվի և ինչպիսի պաշտոնական արձագանք կստանա, քանի որ քաղաքական գործընթացներ պետք է տեղի ունենան, ընտրություններ պետք է անցկացվեն, և որևէ մեկը չգիտի, թե ով կստանձնի իշխանությունը Թուրքիայում: Թուրքական հասարակության համար, նրա խոսքով, սա անհայտ գործընթաց է, քանի որ թուրքական քաղաքական օրակարգը ու կյանքը լի է փոփոխվող հագեցած գործընթացներով: