Հայ հեղափոխական դաշնակացության պատգամավոր Արծվիկ Մինասյանը մայիսի 19-ին ԱԺ ամբիոնից ելույթ ունենալով՝ նշեց, որ ելույթի հիմնական պատճառը Կենտրոնական բանկի նախագահի պաշտոնում առաջադրված Արթուր Ջավադյանի հայտարությունն է, թե փոփոխված օրենքով լինելու է պարտադիր բաղադրիչը, ապա հիշեցրեց՝ Սահմանադրական դատարանի որոշմամբ պարտադիր բաղադրիչը բնութագրող նորմերը ճանաչվել են հակասահմանադրական ու անվավեր, ուստի պնդել, որ պարտադիր բաղադրիչը մնալու է՝ նույն է, թե թույլ տալ հանցագործություն: Մինասյանը հետաքրքրվեց՝ ինչո՞ւ են այդքանից հետո կրկին ասում, որ պարտադիրը մնալու է։
«Ինչո՞ւ եք կրքերը լարում, ինչո՞ւ եք հայտարարում, որ պետք է լինի։ Ես արդեն համոզված եմ ասում, ուրեմն՝ դուք կամ մասնագիտական առումով թերություն ունեք, կամ առնվազն այնպիսի ընթացքի մեջ եք, որ անընդհատ լարվածությունը փորձում եք պահել, մանավանդ այն մեկ քայլից հետո նորից պնդում եք կատարում: Հնարավոր չէ պարտադիր բաղադրիչը վերականգնվի, պարոն Ջավադյան ջան, եթե փորձ արեցիք, պայքարն էլի ենք թեժացնելու։ Ձեզ թվում է՝ հաճելի՞ է անընդհատ այստեղից խոսել դրա մասին։ Խնդրանքս է, աղաչանքս է, այս ամբիոնից մի խոսեք կուտակայինի մասին, քանի նորը չի մշակվել, անունը դիզայն կդնեք, ինչ կդնեք, բայց մի խոսեք»,- ասաց նա:
«Ժառանգություն» խմբակցության ղեկավար Ռուբեն Հակոբյանը նշեց, որ մեր տնտեսության ուղղորդողը վերջին տարիներին եղել է բանկը, և ԿԲ-ն կարողացավ ուղղորդել տնտեսության զարգացումը, որը լավ բանի չբերեց: Խմբակցության ղեկավարը շեշտեց՝ ԿԲ-ն դարձել է քաղաքական մարմին: «Ձեր ցանկությո՞ւնն է դա, թե՞ ձեզ պարտադրեցին, չգիտեմ, բայց ձեր ցանկացած քայլից քաղաքականության հոտ չպիտի գա: Ես Ձեզ բարեկամական խորհուրդ եմ տալիս չքաղաքականացվել ու հայտարարություններում քաղաքական շեշտադրումներ չանել»,- ասաց նա: Հակոբյանը տեղեկացրեց՝ «Ժառանգություն» խմբակցությունը չի մասնակցելու քվեարկությանը:
ՀԱԿ խմբակցության ղեկավար Լևոն Զուրաբյանը նշեց, որ ԿԲ նախագահի թեկնածուի նկատմամբ վստահության հարցը կարելի է դիտարկել որպես իր անձի նկատմամբ վստահություն, սակայն դա սխալ է. այն պետք է դիտարկել որպես վստահության հարց այն անձի նկատմամբ, ով առաջադրել է նրան: «Արդյոք ԿԲ կողմից վարվող վարկային քաղաքականությունն ուղղվա՞ծ է եղել տնտեսական աճի ապահովման քաղաքականությանը: Աշխարհի բոլոր երկրներն առևտրային պատերազմ են տանում՝ իրենց ապրանքի մրցունակությունը միջազգային ասպարեզում ապահովելու համար: Հայաստանն այս հարցում իսկապես տարօրինակ վարք է դրսևորում: Ոչ ոք չի հասկանում՝ ո՞նց կարող է երկիրն առանց պարտադրանքի գնա իր դրամի արժևորմանը, այդ երևույթը բացվում է, երբ բարգավաճում են մի քանի մենաշնորհներ, նրանք, ովքեր մերձավոր են իշխանություններին»,- ասաց նա:
Զուրաբյանը նշեց, որ 2008–ից դրամի կուրսի փոփոխություններին հետևել է, և տեսնում է, որ դրամը ոչ թե սահուն արժեզրկվել է, այլ պետությունն արհեստականորեն պահել է այն, մինչև տեղի է ունեցել դրամի փլուզում: Խմբակցության ղեկավարը նշեց, որ իրենք որևէ ընտրության չեն մասնակցելու, քանի դեռ հաշվիչ հանձնաժողովում խմբակցությունների ընդգրկվածության առումով փոփոխություն չկա:
