Ըստ ՀՀ նախկին վարչապետ Հրանտ Բագրատյանի` այսօր կենսաթոշակների եւ աշխատավարձերի վիճակը Հայաստանում աղետալի է: «Հայաստանում 1995թ. միջին աշխատավարձը կազմել է 17.4 դոլար, Ադրբեջանում` 14 դոլար, Վրաստանում` 10 դոլար: Նույն տարվա կտրվածքով` միջին կենսաթոշակը Հայաստանում եղել է 5.9 դոլար, Ադրբեջանում` 5 դոլար, Վրաստանում` 4 դոլար: 2010թ. Հայաստանում միջին աշխատավարձը կազմել է 286 դոլար, Վրաստանում` 323 դոլար, Ադրբեջանում` 390, միջին կենսաթոշակը Հայաստանում` 60, Վրաստանում` 45 դոլար (Վրաստանը երկու ամիս հետո մեզ կանցնի), Ադրբեջանում` 110 դոլար: Սակայն սա չի նշանակում, թե Հայաստանում թոշակները, աշխատավարձերը մի քանի անգամ բարձրացել են, քանի որ մոտ վեց անգամ դոլարի արժեքն է ընկել»: Ավելին, վարչապետն ընդգծեց, որ եթե Հայաստանում ավելացումը կրկնակի է, հարեւան երկրում 5 անգամ է ավելացել: Բացի այդ, միջին կենսաթոշակը պետք է կազմի միջին աշխատավարձի 50 տոկոսը, այնինչ մեզ մոտ այն 20 տոկոս է կազմում, ինչը ծայրահեղություն է:«Թոշակառուները, իբրեւ ընտրազանգված, ամենամեծն են, հետեւաբար` նրանք ավելի են հակված վերցնելու այդ 5-10 հազար դրամը եւ ձայն տալ ընտրակաշառքի դիմաց: Դա է պատճառը, որ նրանց մշտապես թողնում են այսպիսի նարկոտիկ կախվածության առաջ»: