Թուրքական Ihlas լրատվական գործակալության հաղորդմամբ, թուրքական TPAO նավթային և ուկրաինական Naftogaz ընկերությունը Թուրքիայի Էներգետիկ և բնական ռեսուրսների նախարարությունում ստորագրել են միջաշխատանքային խմբի ստեղծման մասին համաձայնագիրը, ըստ որի` կողմերը Սև ծովում զբաղվելու են նավթի որոնողական և նավթի արդյունահանման աշխատանքներով:
Թուրքիայի էներգետիկ և բնական ռեսուրսների նախարար Թաներ Յըլդըզն այդ արարողակարգի ժամանակ հայտարարել է. «Թուրք-ուկրաինական միջաշխատանքային խմբի ստեղծման պայմանավորվածությունը ձեռք է բերվել այս տարվա հունվարին, երբ վարչապետ Էրդողանն այցելեց Ուկրաինա: Սև ծովում որոնողական աշխատանքները կսկսվեն ապրիլին. այդ նպատակով Հարավային Կորեայից բերվում է հատուկ պլատֆորմ: Մենք հույսը չենք կորցնում, որ մեզ կհաջողվի Սև ծովում հայտնաբերել նավթահանքեր»:
Հիշեցնենք, որ 2008 թվականին Թուրքիան հայտարարեց, որ առաջիկայում լրջորեն զբաղվելու է Սև ծովում նավթահանքերի հայտնաբերմամբ և այդ նպատակով հատկացնելու է 8 միլիարդ դոլար:
Ամենայն հավանականությամբ, այս անգամ նավթի որոնողական աշխատանքները կանցկացվեն Սև ծովի արևելյան հատվածում (Տրապիզոն), քանի որ նախորդ տարի TPAO-ն հորատումներ էր իրականացրել Սև ծովի արևմտյան (Էրեղլի) և կենտրոնական (Սինոպ) հատվածներում, սակայն ոչինչ չէր հայտնաբերվել:
