Թուրք ազգայնականների Yeni Çağ թերթի փոխանցմամբ, Հունաստանում գտնվող արտգործնախարար Ահմեդ Դավութօղլուն Հունաստանի վարչապետ Գեորգիոս Պապանդրուի հետ հանդիպման ժամանակ առաջարկել է կրճատել մարտական ինքնաթիռների թռիչքների քանակն Էգեյան ծովի «վիճելի» կղզիների շրջանում` նշելով, որ ներկայումս աշխատանքներ են տարվում նոր մեխանիզմներ գտնելու ուղղությամբ, որոնք հնարավորություն կընձեռեն ռիսկի նվազեցման համար: Ըստ Դավութօղլուի` 2010 թվականին Հունաստանը Էգեյան ծովի կղզիների շրջանում իրականացրել է 12,346 մարտական թռիչք, իսկ Հունաստանը` 2,843:
Բացի այդ, Դավութօղլուն առաջարկել է ծովային 12 մղոնանոց տարածքային ջրերի գոտու հարցը քննարկման դնել երկու երկրների խորհրդարաններում:
Հիշեցնենք, որ 2010 թվականի հոկտեմբերի 20-ին թուրքական Milliyet թերթը գրեց, որ հունական կողմի տվյալներով, 2000–2009 թվականներին թուրքական ռազմաօդային ուժերը 49,228 անգամ խախտել են իր օդային սահմանը, իսկ Հունաստանի ռազմաօդային ուժերն իրականացրել են 19,888 կանխարգելիչ թռիչք, որոնց վրա ծախսվել է 447,5 միլիոն եվրո:
Ինչ վերաբերում է տարածքային ջրերի գոտուն, ապա 1923 թվականի Լոզանի պայմանագրով տարածքային ջրերի հեռավորությունը սահմանվեց 3 ծովային մղոն (5.6 կիլոմետր): 1936 թվականին Հունաստանը դա հասցրեց 6 ծովային մղոնի (11 կիլոմետր), ինչի արդյունքում Էգեյան ծովի հունական մասնաբաժինը կազմեց 35 տոկոս: Իսկ ահա 1947 թվականին, երբ Դոդեկանեսյան կղզիներն Իտալիայից անցան Հունաստանին, վերջինիս մասնաբաժինն արդեն հասավ 47 տոկոսի, սակայն 6 ծովային մղոնի սահմանագիծը պահպանվեց:
Թուրքական կողմն այժմ պնդում է, որ 12 ծովային մղոնանոց (22 կիլոմետր) տարածքային ջրերի հաշվարկը պետք է սկսվի ոչ թե թուրքական ափերի մոտ ընկած Էգեյան ծովի հունական կղզիներից, այլ` հունական ցամաքից (Բալկանյան թերակղզուց), քանի որ հակառակ դեպքում արդեն Էգեյան ծովում հունական մասնաբաժինը կկազմի 72.8 տոկոս, որով և այն կվերածվի հունական լճի: Թուրքական կողմը վախենում է, թե Հունաստանը կարող է Էգեյան ծովը դարձնել իր ներքին ծովը և դրանով իսկ Միջերկրական ծովից Թուրքիայի դեմ պատ կառուցել:
Օդային սահմանի հարցում Հունաստանը պնդում է, որ միջազգային իրավունքի համաձայն` իր օդային սահմանները տարածվում են Էգեյան ծովի կղզիներից 10 ծովային մղոն (19 կիլոմետր) հեռավորության վրա: Մինչդեռ Թուրքիան հունական օդային տարածությունը ճանաչում է կղզիների շուրջ ընկած միայն 10 կիլոմետր (6 ծովային մղոն) հեռավորության վրա:
Թուրքական կողմի հենց այդ դիրքորոշման պատճառով էլ թուրք օդաչուներն իրենց իրավունք են վերապահում թռչելու Էգեյան ծովում միմյանց հարող կղզիների վրայով, ինչը Հունաստանը դա դիտարկում է որպես իր օդային տարածքի խախտում և կանոնավոր օդ է բարձրացնում իր կործանիչները: Սակայն դրանք կրակ չեն արձակում և մանևրների միջոցով հակառակորդի էսկադրիլիաներին «ուղեկցում» են դեպի թուրքական օդային տարածք, ինչը թուրքական կողմը որակում է որպես «շնային մարտեր»: