Թուրքական Posta թերթի փոխանցմամբ, փետրվարի 15-21-ն ընկած ժամանակահատվածում հարցախույզ է անցկացվել Թուրքիայի բոլոր 81 նահանգներում` պարզելու հասարակության տրամադրվածությունն առաջիկա խորհրդարանական ընտրությունների հանդեպ: Հարցախույզն անցկացվել է սոցիալական կյանքի տարբեր ոլորտները ներկայացնող անձանց շրջանում. 8,98 %-ը հանդիսացել են պետծառայողներ, 32,34 %-ը` աշխատավորներ/հատուկ սեկտորի ներկայացուցիչներ, 9,39 %-ը` գործազուրկներ, 8,38 %-ը` թոշակառուներ, 24,91 %-ը`ազատ մասնագիտություն ունեցող անձինք (ինքնազբաղներ), 16 %-ը` տնային տնտեսուհիներ:
Հարցախույզի մասնակիցները պատասխանել են «Եթե այժմ խորհրդարանական ընտրություններ լինեին, որ կուսակցության օգտին կքվեարկեիք» հարցին. 44 %-ը նշել է իշխող Արդարություն ու զարգացում կուսակցությունը (ԱԶԿ), 24 %-ը` քեմալական Ժողովրդա-հանրապետական կուսակցությունը (ԺՀԿ), 14 %-ը` Ազգայնական շարժում կուսակցությունը (ԱՇԿ), 4,5 %-ը` քրդական Խաղաղություն և ժողովրդավարություն կուսակցությունը (ԽԺԿ), իսկ մնացածը դեռ չեն կողմնորոշվել:
Ուշագրավ է, որ Էրդողանի գլխավորած ԱԶԿ-ի օգտին ամենաշատն արտահայտվել են տնային տնտեսուհիները (58,83 %), ԺՀԿ-ի օգտին` պետծառայողները, իսկ ԱՇԿ-ի օգտին` գործազուրկները:
Հիշեցնենք, որ թուրքական խորհրդարան մուտք գործելու համար քաղաքական կուսակցություններից պահանջվում է հաղթահարել նախընտրական 10 տոկոսանոց բարձր արգելքը: ԵՄ-ը շարունակ քննադատում է Թուրքիային` այդպիսի բարձր ցուցանիշ սահմանելու համար և պահանջում է այն նվազեցնել մինչև 5 տոկոսի: