Թուրքական Akşam թերթի փոխանցմամբ, Ստամբուլի հայկական «Ակօս» թերթի նախկին գլխավոր խմբագիր Հրանտ Դինքի սպանության շուրջ Թուրքիայի Ազգային մեծ ժողովի (ԹԱՄԺ) Մարդու իրավունքների հանձնաժողովի պատրաստած զեկույցն ուղարկվել է Տրապիզոնի հանրապետական դատախազություն:
Զեկույցում խոսք է գնում Տրապիզոնի անվտանգության ծառայության պետի նախկին տեղակալ Էմին Արսլանի, Դինքի սպանության ժամանակ Տրապիզոնի նահանգի անվտանգության ծառայության պետ Ռեշաթ Ալթայի և ոստիկանության գլխավոր տեսուչ Լևենթ Յարըմելինի ծավալած գործունեության մասին:
Հիշեցնենք, որ Հրանտ Դինքն սպանվեց 2007 թվականի հունվարի 19-ին Ստամբուլի Շիշլի թաղամասում Տրապիզոնից ժամանած Օգյուն Սամասթի կողմից: Մարդասպանը հրազենային 3 կրակոց էր արձակել Դինքի գլխի ուղղությամբ և բացականչել գյավուր (անհավատ), ինչը հիմք տվեց ենթադրելու, որ սպանությունն իրականացվել է ազգային հողի վրա: Կասկածներ կան, որ Տրապիզոնի անվտանգության ուժերը (ոստիկանությունն ու ժանդարմերիան) կապված են եղել Հրանտ Դինքի սպանության կազմակերպիչների հետ:
2011 թվականի հունվարի 19-ին թուրք վերլուծաբան Մեհմեթ Ալի Բիրանդը Milliyet թերթում հրապարակած իր հոդվածում նշեց, որ Հրանտ Դինքն սպանվել է թուրքական պետության անտեսման արդյունքում, ինչի համար պատասխանատու բոլոր չինովնիկները ոչ միայն համապատասխան պատասխանատվության չենթարկվեցին, այլև պարգևատրվեցին:
Բիրանդի կարծիքով, Դինքի սպանության հարցում առաջին հերթին մեղավոր են Թուրքիայի ուժային կառույցները, քանի որ թե՛ ոստիկանությունը, թե՛ ժանդարմերիան, թե՛ գաղտնի ծառայության աշխատակիցները հստակ տեղյակ են եղել պատրաստվող սպանությունից, սակայն ոչինչ չեն ձեռնարկել Դինքի սպանության կանխման համար:
