Ըստ թուրքական «Milliyet» թերթի՝ Կարսում գտնվող և հայ-թուրքական բարեկամությունը խորհրդանշող անավարտ հուշարձանի քանդակագործ Մեհմեթ Աքսոյի փաստաբանները մի գրություն են ուղարկել Կարսի քաղաքապետարան, որում զգուշացրել են, որ վերջինիս կողմից հուշարձանի ապամոնտաժման շուրջ տենդեր հայտարարելու գործընթացը ժամանակավրեպ է և իրավական տեսանկյունից ապօրինի:
Գրության մեջ նշված էր, որ թեև Էրզրումի 1-ին վարչական դատարանը ներկայումս կանգնեցրել է հուշարձանի ապամոնտաժման գործընթացը, այնուամենայնիվ, Կարսի քաղաքապետարանը շարունակում է հուշարձանի ապամոնտաժման գործով շահագրգիռ ընկերությունների հայտերի ընդունումը, ինչի համար էլ քաղաքապետարանի համապատասխան անձինք կարող են ենթարկվել քրեական պատասխանատվության:
Հիշեցնենք, որ հունվարի սկզբին Կարս այցելած Թուրքիայի վարչապետ Էրդողանն այդ հուշարձանը որակեց որպես «այլանդակ» և այն ապամոնտաժելու հրահանգ տվեց: Այդ ժամանակ էլ Մեհմեթ Աքսոյը հայտարարեց, որ եթե Էրդողանը քանդել տա Կարսի խաղաղության հուշարձանը, ապա կնմանվի «Թալիբան»-ին, որը 2001 թվականին Աֆղանստանում ոչնչացրել էր Բուդդայի երկու վիթխարի (55 և 37 մետր բարձրությամբ) հուշարձանները:
Ի դեպ, օրեր առաջ էլ Կարսի նախկին քաղաքապետ Նաիֆ Ալիբեյօղլուն, որի օրոք էլ կառուցվել է այդ հուշարձանը, հայտարարեց, որ հուշարձանի քանդման խնդրանքով Էրդողանին դիմել է Ադրբեջանի նախագահ Իլհամ Ալիևը: Սակայն դժվար է կարծել, որ եթե Ալիևի ցանկությունը չհամապատասխաներ Էրդողանի շահերին, ապա նա կկայացներ նմանատիպ վճիռ. քանի որ Թուրքիայի հայ համայնքը շատ փոքր է` համեմատած թուրք ազգայնականների հետ, ուստիև դրանով Էրդողանը ձգտում է իր կողմ գրավել ազգայնական ընտրազանգվածին:
Հենց այդ պատճառով էլ Ազգայնական շարժում կուսակցության (ԱՇԿ) ներկայացուցիչ, Իզմիրից ընտրված կին պատգամավոր Շենոլ Բալը քաղաքական շոու անվանեց հունիսին կայանալիք խորհրդարանական ընտրություններից առաջ Էրդողանի կողմից հուշարձանի քանդման կոչը` նշելով, որ այդ հուշարձանն արդեն մի քանի տարի է, ինչ կանգնած է Կարսում, մինչդեռ Էրդողանը դրա մասին հիշեց միայն հիմա` ընտրություններից առաջ. «Կարսի տարածաշրջանում գտնվում են տասնյակ հազարավոր թուրք զինվորների գերեզմաններ: Բնականաբար, նույն վայրում հայ-թուրքական բարեկամությունը խորհրդանշող հուշարձանի առկայությունը հարուցում է տեղի բնակչության դժգոհությունը: Վարչապետը քաջ գիտակցում է այդ հանգամանքը և օգտվում է դրանից»:
