Թուրքական «Hürriyet» թերթի փոխանցմամբ, Ստամբուլի կարևորագույն առևտրային կենտրոններից մեկը հանդիսացող Շիշլիի հրապարակում վարչապետ Էրդողանի հովանավորությամբ կառուցվում է պոլսահայ համայնքին պատկանող մի բիզնես կենտրոն: Այդ տարածքը պատկանում է Քարագյոզյան մանկատան հիմնադրամին, և որ այդ կենտրոնից ստացվելիք գումարը ծախսվելու է 200 հայ որբերի ու աղքատ աշակերտների կարիքների վրա: Հիմնադրամի նախագահ Տիգրան Գյուլմեզգիլը հայտարարել է, որ իրենք մեծ աջակցություն են ստացել Էրդողանից.
«Շիշլիի հրապարակում վեր խոյացող այս շինությունը գրավում է բոլոր հետաքրքրասերների ուշադրությունը: Ժամանակ առ ժամանակ շենքի հետ կապված ռեպորտաժներ էին պատրաստվում, սակայն ցայժմ մենք չենք բարձրաձայնել, որ այս գործում մեծ ավանդ ունի վարչապետ Էրդողանը, չենք ցանկացել գովազդել նրան: Մինչդեռ այժմ, երբ շինարարական աշխատանքները մոտենում են իրենց ավարտին, մենք մտածեցինք, որ ժամանակն է բարձրաձայնելու այդ մասին»:
Հիշեցնենք, որ ուղիղ մեկ տարի առաջ նույն Էրդողանն սպառնացել էր Թուրքիայից արտաքսել այնտեղ ապօրինաբար աշխատող հայերին, ինչը հարուցել էր միջազգային հանրության, ինչպես նաև թուրքական հասարակության որոշ շերտերի դժգոհությունը. «Իմ տվյալներով, Թուրքիայում բնակվում է 170 հազար հայեր, որոնցից միայն 70 հազարն են Թուրքիայի քաղաքացիներ: Նրանցից շատերը Թուրքիայում ապրում են ավելի քան 10 տարի, և մենք այս հարցը չենք պատրաստվում հապճեպորեն լուծել, բայց եթե ամեն բան նույն կերպ շարունակվի, մենք ստիպված կլինենք վերագնահատել իրավիճակը և համապատասխան քայլեր ձեռնարկել: Ի վերջո, այդ 100 հազար մարդիկ մեր քաղաքացիները չեն, և եթե կարիք լինի, մենք կվտարենք նրանց մեր երկրից»:
Ինչ վերաբերում է Էրդողանի ունեցած ներդրման մասին Գյուլմեզգիլի կողմից հենց այժմ բարձրաձայնելուն, ապա կարելի է ենթադրել, որ դա ավելի շատ պայմանավորված է ոչ թե շինարարական աշխատանքների ավարտին մոտենալով, այլ` մոտ երեք ամիս անց կայանալիք խորհրդարանական ընտրություններով:
