Թուրքական «Cumhuriyet» թերթի փոխանցմամբ, երկրի վերնախավի շրջանում մեծ զայրույթ է առաջացրել Թուրքիայում քաղաքացիական ազատությունների ոտնահարման շուրջ Եվրախորհրդարանի երեկ հրապարակած զեկույցը: Դրան անմիջապես արձագանքել է պետնախարար և ԵՄ-ին Թուրքիայի լիիրավ անդամակցության գծով գլխավոր բանագնաց Էգեմեն Բաղըշը.
«Ցայժմ մենք «ականատես չենք եղել» որևէ խորհրդարանական զեկույցի, որը կլիներ հավասարակշռված և կհամապատասխաներ իրականությանը: Այսօր Թուրքիան խոսքի ազատության ցուցանիշով «գերազանցում» է ԵՄ-ի անդամ մի շարք երկրներին: Այսօրվա Թուրքիան երեկվա Թուրքիայից առավել ժողովրդավար է, քանի որ երկրում շարունակ իրականացվում են բարեփոխումներ: Այսօր Թուրքիան զարգացող երկրների շարքում զբաղեցնում է առաջատար դիրքեր` զիջելով միայն Չինաստանին, Հնդկաստանին ու Բրազիլիային»:
Եվրախորհրդարանի զեկույցին հակազդել է նաև Թուրքիայի արտգործնախարար Ահմեթ Դավութօղլուն. «Այդ զեկույցը կողմնակալ է և անընդունելի մեզ համար: Մենք ակնկալում ենք, որ Եվրախորհրդարանն այսուհետ առավել արդար և օբյեկտիվ մոտեցում կցուցաբերի Թուրքիայի հանդեպ»:
Նշվում է, որ թուրքական կողմի համար վերջին տարիներին Թուրքիայի վերաբերյալ Եվրախորհրդարանի ամենախիստ զեկույցում միակ սփոփանքն այն է, որ Եվրախորհրդարանը ձայների մեծամասնությամբ մերժել է զեկույցում Հայոց ցեղասպանության ճանաչման անհրաժեշտության ներառման մասին Հունաստանի ու Կիպրոսի պատգամավորների առաջարկը:
Հիշեցնենք, որ Եվրախորհրդարանի երեկվա զեկույցում նշված էր այն մասին, որ Թուրքիայում լրջորեն ոտնահարվում է խոսքի ազատությունը, թերացումներ կան դատական համակարգում, ոստիկանությունը բռնություններ է գործադրում «Էրգենեկոնի» և «Բալյոզի» գործերով ձերբակալված անձանց հանդեպ, մի շարք ինտերնետային կայքեր արգելափակվել են:
Զեկույցում նաև ցանկություն է հայտնվել, որ թուրքական իշխանություններն ապահովեն կասկածյալների իրական դատական անվտանգությունը, ինչպես նաև թուրքական իշխանություններին կոչ արվել զորքերը դուրս բերելու Կիպրոս կղզու հյուսիսային հատվածից:
