Հայաստանի սիմֆոնիկ նվագախմբի նախկին դիրիժոր, կոմպոզիտոր Լորիս Ճգնավորյանն այս օրերին Հայաստանում է՝ իր ծննդյան 75 ամյակի կապակցությամբ: Հայաստանի Հանրային հեռուստաընկերության «Հարցազրույց» հաղորդմանը հյուրընկալվելով՝ կոմպոզիտորը նշել է, որ, այսպես ասած, մշտական բնակության վայր չունի, լինում է Թեհրանում, Վիեննայում, ԱՄՆ-ում, որտեղ զբաղվում է զուտ ստեղծագործական աշխատանքով՝ օպերա է գրում:
«11 տարիներին, երբ դիրիժոր էի, ոչինչ չէի հասցնում գրել. հիմա հասցնում եմ օպերա գրել: Ինչ-որ բան չի խախտվել, իմ սերը հայրենիքի նկատմամբ նույնն է մնացել, պարզապես չեմ կարողանում մշտապես լինել այստեղ: Ես անձամբ եմ խնդրել դեռ Խորհրդային տարիներին Հայաստան գալ, աշխատավարձս մեկ դոլար էր, բայց ասի՝ թողեք ծառայեմ: Մնացի նաև ցուրտ ու մութ տարիներին»,- ասել է Լորիս Ճգնավորյանը:
Երբ մաեստրոն թողեց Գլենդելի սիմֆոնիկ նվագախումբը, լուրեր տարածվեցին, թե նրան հեռացրել են նվագախմբից: Դիրիժորը եթերում ներկայացրել է իրականությունը. «Գլենդելի սիմֆոնիկը թողել եմ, քանի որ սնանկացավ: Ժողովուրդը ևս սնանկացած վիճակում է, և այլևս չի կարող հովանավորել նվագախումբը: Իսկ ԱՄՆ-ում պետությունը նման բաները չի հովանավորում, ուստի ժամանակավոր դադարեցվել է գործունեությունը, ինչի համար շատ որախ եմ, որովհետե հիմա կարողանում եմ գրել»:
Լ. Ճգնավորյանը հասցրել է թողարկել 20 CD և DVD, ևս 10 CD պետք է թողարկվի:
Մաեստրոն ցավ է հայտնել, որ Հայաստանին դեռ չի հաջողվել ունենալ միջազգային մակարդակի դիրիժոր: Կան, իհարկե, կոմպոզիտորներ, դիրիժորներ, որ մեկնում են հյուրախաղերի: Եվ՝ այդքանը:
Կարճատև անդրադարձ կատարելով Հայաստանի ներքին խնդիրներին՝ Ճգնավորյանն ափսոսանք է հայտնել ահռելի թիվ կազմող արտագաղթի համար. «Ցավ է, որ այս հողի վրա ծնվում են, ապրում, պատրաստվում, ապա թողնում-գնում: Կուզենամ, որ լավ աշխատեն այս հողի վրա, չգնան: Պետք է ժողովրդին հարստացնելով երկիրը հարստանա, ժողովրդին աղքատացնելով՝ չի հարստանա երկիրը»: