Պոլսահայերի «HyeTert»-ը հայտնում է, որ Սասունի հայերի սոցիալական օգնության միությունը, որի կենտրոնական գրասենյակը գտնվում է Ստամբուլում, իր նպատակների իրականացման թույլտվությունը ստանալու նպատակով հաջորդ ամիս դիմելու է Մարդու իրավունքների եվրոպական դատարան (ՄԻԵԴ):
Միության նախագահ Ազիզ Դաղջըն հայտարարել է, որ իրենք նպատակադրվել են զարգացում հաղորդել Վանում, Բիթլիսում, Մուշում, Սղերթում և Բաթմանում բնակվող հայերի մշակութային, լեզվական և կրոնական ինքնությանը:
Դաղջըն հիշեցրել է, որ երկու տարի առաջ իրենք, վեց կազմակերպության հետ մեկտեղ, ցանկացել են ստեղծել համապատասխան հիմնադրամ, սակայն Ստամբուլի 5-րդ դատարանը Թուրքիայի քաղաքացիական օրենսգրքի 101-րդ հոդվածի 4-րդ կետի հիման վրա մերժել է դա:
Դաղջըն դատարանի այդ որոշումը որակել էր որպես խտրական` նշելով, որ դրանով իսկ դատարանն արգելք դրեց իրենց ազատությունների վրա, որոնք ամրագրվել են դեռևս 1923 թվականի Լոզանի պայմանագրով:
Նշվում է, որ Առաջին համաշխարհային պատերազմից առաջ Սասունի շրջանում բնակվում էր ավելի քան 20,000 հայ, որոնք ունեին 127 եկեղեցի, 6 վանք և 15 հոգևոր դպրոց: