Ըստ թուրքական «Cumhuriyet» թերթի՝ Թուրքիայի Բարձրագույն ընտրական խորհուրդը (YSK) հայտարարել է, որ հունիսի 12-ին կայանալիք խորհրդարանական ընտրություններում 550 անդամներից բաղկացած Թուրքիայի Ազգային մեծ ժողովի (ԹԱՄԺ) կազմում ընդգրկվելու համար արդեն իսկ գրանցվել է 14,850 թեկնածու, որոնք ներկայացնում են 27 քաղաքական կուսակցություններ:
Նշվում է, որ կան նաև հազարավոր անկախ թեկնածուներ, ուստի ակնկալվում է, որ թեկնածուների թիվը կգերազանցի 25,000-ը:
Հիշեցնենք, որ թուրքական խորհրդարան մուտք գործելու համար քաղաքական կուսակցություններից պահանջվում է հաղթահարել նախընտրական 10 տոկոսանոց բարձր արգելքը, ինչն այս տարի հաջողությամբ կհաղթահարեն իշխող «Արդարություն և զարգացում» և ընդդիմադիր, քեմալական Ժողովրդա-հանրապետական կուսակցությունները: Կասկածի տակ է հայտնվել «Ազգայնական շարժում» կուսակցության հաջողությունը:
Ինչ վերաբերում է քրդերին, ապա նրանք 2007 թվականի արտահերթ խորհրդարանական ընտրության նման վճռել են դարձյալ հանդես գալ ոչ թե միացյալ կուսակցությամբ («Խաղաղություն և ժողովրդավարություն»), այլ առանձին թեկնածուներով, ինչի շնորհիվ էլ ակնկալվում է, որ Թուրքիայի արևելյան և հարավարևելյան շրջաններում, ուր գլխավորապես քրդեր են ապրում, քուրդ թեկնածուները մեծ հաջողություններ կարձանագրեն:
