Թուրքական «Cihan» լրատվական գործակալության փոխանցմամբ` վարչապետ Էրդողանը, ելույթ ունենալով իր գլխավորած Արդարություն ու զարգացում կուսկացության (ԱԶԿ) խմբակցությունում, անդրադարձ է կատարել «Էրգենեկոնի» գործով ձերբակալված 27 լրագրողների խնդրին.
«Այո’, ներկայումս թուրքական բանտերում են գտնվում 27 լրագրողներ, սակայն նրանցից և ոչ մեկի ձերբակալությունը պայմանավորված չէ նրանց մասնագիտական գործունեությամբ: Իսկ դա նշանակում է, որ նրանք չեն ձերբակալվել կառավարությանը քննադատելու համար: Մի՞թե ցայժմ դուք ականատես եք եղել նրան, որ կառավարությանը քննադատելու համար մեր երկրում լրագրող ձերբակալվի: Այստեղ նշանակություն էլ չունի, թե որ լրատվամիջոցն են ներկայացրել ձերբակալված լրագրողները:
Նրանց ձերբակալման պատճառները տարբեր են. բռնի կերպ սահմանադրական կարգի տապալման փորձեր ձեռնարկելը, ահաբեկչական զինված կազմակերպությանն անդամագրվելը, սեռական բռնություն գործադրելը, ապօրինի կերպ հրազեն պահելը, պաշտոնական փաստաթղթերի ոչնչացումը և այլն»:
Հիշեցնենք, որ 2010 հոկտեմբերի 20-ին «Լրագրողներ առանց սահմանների» (RSF) կազմակերպության հրապարակած զեկույցում Թուրքիայում խոսքի և մամուլի ազատության մակարդակը որակվել էր որպես աղետալի. խոսքի ազատության ցուցանիշով Թուրքիան աշխարհի 178 երկրների շարքում զաղեցրել էր 138-րդ տեղը: Իսկ սեպտեմբերի վերջին Թուրքիայի նախագահ Գյուլը լրագրողի աշխատանքը որակել էր որպես շատ վտանգավոր` նշելով, որ վերջին շրջանում միայն «Զաման», «Թարաֆ», «Բուգյուն», «Ենի Շաֆաք», «Սթար» և «Վաքիթ» թերթերի դեմ անցկացվել է 3500 հետաքննություն:
Ինչ վերաբերում է «Էրգենեկոնին», ապա այն ազգայնական ուղղության գաղտնի կազմակերպություն է, որի անվանումը ծագում է Էրգենեկոն առասպելական տեղանունից, որտեղից ծնունդ է առել թուրք ժողովուրդը: Այս կազմակերպությանը մեղադրվում է բազմաթիվ սպանությունների և դրանց արդյունքում ստեղծված քաոսի շնորհիվ հեղաշրջման նախադրյալներ ստեղծելու մեջ: Գործող իշխանությունները մեղադրվելու էին իրավիճակին տիրապետելու անկարողության մեջ: Փաստորեն, «Էրգենեկոնի» հիմնական նպատակը Թուրքիան որպես աշխարհիկ երկիր պահելն էր:
