57-ամյա ֆրանսիացի Մարկ Բրունետը հուլիսի 21-ին իր հայրենի Վալենսիա քաղաքից սկսել է 6000 կիլոմետրանոց հեծանվաարշավ դեպի Հայաստան: Այս յուրահատուկ բարեգործական ճանապարհորդությունը տևել է 2 ամիս: Լինելով ավելի քան 10 երկրներում (Շվեյցարիա, Գերմանիա, Ավստրիա, Սլովակիա, Հունգարիա, Ռումինիա, Մոլդովա, Ուկրաինա, Ռուսաստան, Թուրքիա, Վրաստան)` Բրունետը գումար է հավաքել Շիրակամուտ գյուղի «Արևիկ» մանկապարտեզի վերանորոգման համար:
Այսօր Հայաստանում Ֆրանսիայի դեսպանատանը Մարկ Բրունետն ու Հայաստանում Ֆրանսիայի դեսպան Անրի Ռենոն հյուրընկալեցին լրագրողներին: Դեսպանը հեծանվորդի արարքը մեծ սխրանք որակեց, ոչ սովորական մի առաքելություն, որն ամեն մարդ ի զորու չէ անել:
Ֆրանսիացի մարզիկը առանձնահատուկ ջերմությամբ էր խոսում Հայաստանի և հայ ժողովրդի մասին. «Նման լայն արձագանք և խանդավառություն չէի ակնկալում, ինքս իմ արարքը մեծ սխրանք չեմ համարում: Չէի սպասում անգամ, որ սա այսպիսի մեծ արձագանք կգտնի լրագրողների շրջանում: Շատ շնորհակալ եմ»:
Բրունետը պատմեց, որ Հայաստանի հանդեպ հետաքրքրությունն իր մոտ ծագել է դեռ 1988 թվականի ավերիչ երկրաշարժից հետո: Այդ ժամանակվանից նա ցանկացել է ինչ-որ կերպ օգտակար լինել հայ ժողովրդին: Հանդիպման ժամանակ մարզիկը կիսվեց ճանապարհորդության ընթացքում իր ստացած տպավորություններով:
«Միակ խոչընդոտը, ինչին հանդիպել եմ, լեզուների չիմացությունն էր: Տիրապետում եմ ֆրանսերենին, մի փոքր էլ` անգլերենին: Մարդիկ ճիշտ է` մեծ դժվարությամբ, բայց, այնուամենայնիվ, հասկացան ինձ և հնարավորության սահմաններում օգնեցին: Այսօր ես հավաքել եմ ավելի քան 10.000 եվրո, որը մոտ օրերս կփոխանցեմ մանկապարտեզի հաշվեհամարին»:
Ի դեպ, Մարկ Բրունետը հիացած էր Հայաստանի բնությամբ և նախատեսում է հեծանվաարշավ կազմակերպել դեպի Էջմիածին:
Լուսանկարը՝ PanARMENIAN Photo-ի