Ռուսական հեղինակավոր թերթը անդրադարձել է տրանսկասպյան խողովակաշարի կառուցման նախագծին, որը Nabucco-ի կարևորագույն բաղադրիչներից է:
Նշվում է, որ Թուրքմենստանի մայրաքաղաք Աշխաբադում երեկ ավարտվել է խողովակաշարի կառուցման և շահագործման բնապահպանական ասպեկտներին նվիրված համաժողով, որին մասնակցել են առաջատար ընկերությունների ներկայացուցիչներ ու փորձագետներ:
Հենց կասպյան խնդիրն է, հոդվածագրի կարծիքով, Nabucco-ի իրականացման հիմնական խոչընդոտը, քանի որ ափամերձ 5 երկրները մինչ այսօր համաձայնության չեն կարողանում գալ ծովի բաժանման հարցում: Սակայն Աշխաբադը վերջին շրջանում հայտարարում է, որ խողովակաշարի կառուցման համար բավարար է միայն այն երկրների համաձայնությունը, ում ջրային հատվածով անցնելու է խողովակաշարը: Այդ դեպքում այն կկառուցվի թուրքմենական և ադրբեջանական հատվածներով, բացառելով Իրանը, որը դեմ է նախագծին:
Բնապահպանական համաժողովի ժամանակ Թուրքմենստանի նախագահ Գուրբանգուլի Բերդիմուհամեդովը շեշտել էր, որ նախագծի իրականացման ժամանակ պետք է խստորեն պահպանվեն բնապահպանական բարձրագույն պահանջները:
Էներգետիկ խոշոր ընկերությունների ներկայացուցիչներն էլ համակարծիք են, որ խողովակներով գացի տեղափոխումը շատ ավելի անվտանգ է, քան այն խտացնելն ու տանկերներով տեղափոխելը, իսկ տրանսկասպյան խողովակաշարի ազդեցությունը շրջակա միջավայրի վրա լինելու է աննշան:
Թուրքմենստանի նախագահի աշխատակազմից հայտարարում են, որ շատ մոտ ապագայում Աշխաբադի ու Բաքվի միջև սկսվելու են բանակցություններ, և չի բացառվում, որ արդեն մինչև այս տարվա վերջ երկրները կոնկրետ պայմանավորվածություն կստորագրեն Եվրամիության հետ:
Իսկ արևմտյան փորձագետները խորհուրդ են տվել Ադրբեջանին և Թուրքմենստանին միջկառավարական պայմանագիր ստորագրել, որի համաձայն` հնարավոր կլինի սկսել բնապահպանական ռիսկերի գնահատման գործընթաց, առանց որի` հնարավոր չէ առաջընթաց ունենալ նախագծի իրականացման հարցում: