«Առաջին լրատվական»-ի զրուցակիցն է Հայ ազգային կոնգրեսի կենտրոնական գրասենյակի անդամ, ԵԽԽՎ-ում Կոնգրեսի ներկայացուցիչ Արման Գրիգորյանը
– Պարոն Գրիգորյան, հոկտեմբերի 27-ին Աստրախանում Ռուսաստանի նախագահ Դ.Մեդվեդեւի հովանու ներքո անցկացվեց Սարգսյան-Ալիեւ-Մեդվեդեւ 7-րդ հանդիպումը, որի արդյունքում համատեղ հայտարարություն ընդունվեց: Խոսքը վստահության ամրապնդմանն ուղղված միջոցառումների հատուկ հռչակագրի մասին է, փաստաթղթով ենթադրվում է «ռազմագերիների փոխանակություն եւ զոհվածների մարմինների վերադարձ»: Ինչպե՞ս եք գնահատում այս հռչակագիրը, այն ի՞նչ ընթացք կարող է հաղորդել ԼՂ կարգավորման բանակցային գործընթացին:
– Ես կարծում եմ, որ սա խնդիրը կարգավորելու ահագնացող ճնշման հերթական բաղկացուցիչն է: Գերիների եւ զոհվածների դիակների փոխանակման վերաբերյալ համաձայնությունն էլ, թերեւս, միտված է վերջին շրջանում սովորականից ավելի շիկացած մթնոլորտը մի փոքր մեղմելուն:
– Աստրախանում կողմերը քննարկել են ԼՂ հակամարտության կարգավորման գործընթացի մանրամասներ` բանակցային աշխատանքը մինչեւ Աստանայում կայանալիք ԵԱՀԿ գագաթնաժողովը շարունակելու եւ հիմնական սկզբունքների շուրջ փոխհամաձայնության գալու նպատակով: Դուք նման հնարավորություն տեսնո՞ւմ եք` մինչեւ տարեվերջ հիմնական սկզբունքների շուրջ փոխհամաձայնության գալու ուղղությամբ:
– Վստահ եմ` շատերը ինձ հետ կհամաձայնեն, որ Աստրախանում հանդիպման հետ կապված ամենահետաքրքիր փաստը Մեդվեդեւի արած հայտարարությունն էր այն մասին, որ կողմերը կարող են համաձայնության գալ արդեն դեկտեմբերին: Առանց լուրջ հիմքերի այդ մակարդակի պետական գործիչների հայտարարությունները սովորաբար այդ աստիճանի համարձակ ճշգրտություն չեն ունենում:
– ԱՄՆ Պետքարտուղարության ներկայացուցիչ Ֆիլիպ Քրոուլին հայտարարել է, որ ԱՄՆ-ը գնահատում է ՌԴ ջանքերը ԼՂ հարցի կարգավորման ուղղությամբ: Քրոուլիի խոսքով, Ռուսաստանի, Հայաստանի եւ Ադրբեջանի նախագահների` Աստրախանում հոկտեմբերի 27-ի հանդիպման արդյունքում ստորագրված համատեղ հայտարարությունը «դրական առաջընթաց է շարունակվող բանակցային գործընթացի շրջանակներում, որի նպատակը Լեռնային Ղարաբաղի հակամարտության խաղաղ կարգավորումն է»: «Մենք հուսով ենք, որ ձեռք բերված համաձայնությունները կիրականացվեն ամենակարճ ժամկետներում»: Պաշտոնական Փարիզը եւս ողջունել է համատեղ հայտարարությունը. «Աստրախանյան համաձայնությունները կարող են նպաստել վերջին շրջանում հաճախացած հրադադարի ռեժիմի խախտման դեպքերի նվազեցմանը», – ասված է ԵԱՀԿ Մինսկի խմբում համանախագահող երկրի արտգործնախարարության տարածած հաղորդագրությունում: Ձեր կարծիքով, համանախագահող երկրները եկե՞լ են համաձայնության մինչեւ տարեվերջ համաձայնության հասնելու շուրջ, թե՞ սրանք հերթապահ հայտարարություններ են:
– Գուցե եկել են, եւ այլ պատճառներ հաստատ կան այդպես մտածելու համար: Բայց ես չեմ կարծում, որ այս հայտարարություններն ուրիշ բովանդակություն կունենային, եթե նույնիսկ նրանք համաձայնության եկած չլինեին: Դժվար է պատկերացնել, որ նրանք հրապարակայնորեն քննադատեին ղարաբաղյան կարգավորման ուղղությամբ արվող որեւէ քայլ, եթե նույնիսկ այդ քայլը նրանց սրտով չլիներ:
– Հոկտեմբերի սկզբին ԼՂ-ի հարակից տարածքներում իրականացվեց ԵԱՀԿ փաստահավաք առաքելություն, որին մասնակցում էին նաեւ փորձագետներ ՄԱԿ-ից: Այն փաստը, որ այժմ իրականացվեց փաստահավաք առաքելություն` չի՞ վկայում այն մասին, որ բանակցային գործընթացը որոշակի կարեւոր փուլի է հասել:
– Եթե այդ փաստը համադրենք բանակցային գործընթացում տեղի ունեցող մյուս իրադարձությունների հետ, ապա դժվար է ձեր հարցին այո-ից բացի, ուրիշ պատասխան տալ:
