Հայաստանի ազգային հավաքականի ֆուտբոլիստ Հենրիկ Մխիթարյանը պատասխանել է ՈւԵՖԱ-ի մեդիաբաժանմունքի աշխատակցի հարցերին:
– Հենրիկ, Հայաստանի հավաքականը «Եվրո-2012»-ի ընտրական փուլը շատ հաջող անցկացրեց և լավ արդյունքի հասավ: Նոր ընտրական փուլ է մեկնարկել: Ի՞նչ տպավորություններ ունեք Հայաստանի հավաքականի՝ նոր խաղերին նախապատրաստության ծրագրից:
– «Եվրո-2012»-ի ընտրական փուլն արդեն պատմություն է, և դրա հետ կապված չեն լավագույն հիշողություններս: Մենք կփորձենք ամեն ինչ անել, որպեսզի նոր հաջողությունների հասնենք:
– «Եվրո-2012»-ի ընտրական փուլից բավականին մեծ ժամանակ է անցել: Ի՞նչ գնահատական կտաք այդ փուլում Ձեր թիմի խաղին:
– Կարող եմ ասել, որ կարող էինք ավելի լավ խաղալ: Մեր մարզիչը երիտասարդ թիմ է ստեղծում և վստահում է բազմաթիվ երիտասարդ խաղացողների: Նրան ժամանակ է հարկավոր: Նա նոր սխեմաներ է փորձարկում, և առաջին խաղերում դժվարություններ ունեցանք: Այժմ պետք է փորձենք դասեր քաղել արդեն ավարտված խաղերից:
– Անցած հարցազրույցի ժամանակ Դուք պնդում էիք, որ Հայաստանի հավաքականի հաջողությունը ոչ թե պատահականության, այլ ֆուտբոլիստների և մարզիչների քրտնաջան աշխատանքի արդյունք է: Ո՞րն է նման հաջողության գաղտնիքը:
– Հավաքականի կազմում հանդես եկող ֆուտբոլիստները փորձում են խաղադաշտում թողնել իրենց ողջ ուժն ու էներգիան: Բոլորը ցանկանում են աշխատել և կատարելագործել իրենց որակները: Նա, ով քրտնաջան աշխատում է, հասնում է արդյունքի:
– Այդ հաջողություններից հետո հայերն ավելի՞ շատ են սկսել հետաքրքրվել ֆուտբոլով:
– Ֆուտբոլի նկատմամբ հետաքրքրությունը միշտ եղել է, սակայն կար մի ժամանակահատված, որ ոչ ոք չէր հավատում մեր թիմի հաջողությանը: Հիմա մարդիկ հավատում են մեզ և մեծ հույսեր են կապում մեզ հետ:
– ԱԱ ընտրական փուլի առաջին խաղը տեղի կունենա Իտալիայի հավաքականի հետ: Կարո՞ղ է հաջողություններ ունենալ Ձեր հավաքականն այդ խաղում:
– Մենք ամեն ինչ կանենք, որ ոչ միայն խնդիրներ ստեղծենք Իտալիայի հավաքականի համար, այլև հաղթանակ տանենք, քանի որ հանդես ենք գալու տանը՝ սեփական երկրպագուների ներկայությամբ: Մենք պետք է անենք հնարավորը:
– Ի՞նչ կարող եք ասել Իտալիայի ազգային հավաքականի՝ «Եվրո-2012»-ում ելույթների մասին:
– Իտալացիներն ամենադիտարժան խաղը ցուցադրեցին «Եվրո-2012»-ում: Նրանք հրաշալի էին խաղում, և հակառակորդները չէին կարողանում հակախաղ գտնել: Նրանք արժանի էին եզրափակիչում խաղալուն:
– Հայաստանի հավաքականը կարո՞ղ է հաղթահարել խմբային փուլի արգելքը:
– Մենք չենք մտածում, թե որ հավաքականին կարող ենք հաղթել կամ պարտվել: Մենք խաղում ենք մեր ազգի համար, և ամեն ինչ կանենք հաղթանակների հասնելու համար:
– Որո՞նք են Հայաստանի հավաքականի ուժեղ կողմերը:
– Խաղադաշտում բազմաթիվ երիտասարդ խաղացողներ կան, նրանք մոտիվացված են և ձգտում են հաղթանակների հասնել: Մենք փորձում ենք օգնել միմյանց, իսկ եթե ինչ-որ մեկը սխալվում է, ոչ ոք չի մեղադրում նրան:
– Ի՞նչ կասեք Վարդան Մինասյանի կատարած աշխատանքի մասին: Ի՞նչ ազդեցություն ունի նա թիմում:
– Նա շատ երիտասարդ և լավ մարզիչ է: Մենք ուրախ ենք, որ աշխատում ենք նման մարզչի հետ: Մեր բախտը բերել է, որ հանդես ենք գալիս նրա գլխավորությամբ:
– Դուք նրա հետ աշխատել եք նաև «Փյունիկ»-ում: Այդ հանգամանքն ազդո՞ւմ է ձեր հարաբերությունների վրա՝ այն դարձնելով ավելի յուրահատուկ:
– Ամենակարևորն այն է, որ նա հասկանում է խաղացողներին: Մինասյանը ֆուտբոլիստի իր կարիերան մի քանի տարի առաջ է ավարտել: Նա համապատասխան խորհուրդներ է տալիս մեզ, որպեսզի կարողանանք կատարելագործվել:
– Վերջին 3 տարիների ընթացքում Դուք 2 անգամ ճանաչվել եք Հայաստանի տարվա լավագույն ֆուտբոլիստ: Ի՞նչ եք կարծում, մե՞ծ էր առաջընթացն այդ 3 տարիներին:
– Չեմ կարող ինքս դատել: Ցանկանում եմ շարունակել կատարելագործել որակներս: Ցանկանում եմ շնորհակալություն հայտնել թիմիս անդամներին, առանց որոնց հնարավոր չէր լինի նման հաջողությունների հասնել: Ես ամեն օր աշխատում եմ, որ ավելի բարձրակարգ խաղ ցուցադրեմ:
– Հայաստանի հավաքականում կան Ռոման Բերեզովսկու և Սարգիս Հովսեփյանի նման փորձառու խաղացողներ: Դուք Չեմպիոնների լիգայի պես խոշոր մրցաշարում խաղալու փորձ ունեք: Ի՞նչ եք կարծում, մոտ ժամանակներս կդառնա՞ք թիմի առաջատար:
– Ինձ համար մեծ պատիվ է այդ ֆուտբոլիստների հետ խաղալը: Նրանք հայկական ֆուտբոլի լեգենդներն են: Ես սովորում եմ նրանց հետ խաղալով: Ցանկանում եմ օգուտ տալ թիմիս և հասնել Ձեր նշած ֆուտբոլիստների մակարդակին:
– Միրչա Լուչեսկուի հետ աշխատանքից հետո բարելավե՞լ եք Ձեր խաղային որակները:
– Ցանկանում աշխատել հնարավորինս շատ և չչարաշահել մարզիչներիս վստահությունը: Միրչա Լուչեսկուի շնորհիվ Ուկրաինայի առաջնության 8 խաղերում 11 գոլ եմ խփել:
– Ո՞ր գործոնը որոշիչ կլինի և կօգնի Չեմպիոնների լիգայի գավաթի խաղարկության խմբային փուլ դուրս գալ:
– Լավ ֆուտբոլն ու լավ արդյունքները: