Իտալիայում հայտնվել է սպորտային մեքենաների նոր արտադրող` Juliani Automobili ընկերությունը: Ներկա պահին ընկերությունը տարածել է միայն իր նոր մեքենայի մասին տեղեկություն և լուսանկարներ, որը ստացել է Veela անունը, սակայն չի ճշտվում թե երբ է նախատեսվում կառուցել առաջին փորձնական ավտոմեքենան և սկսել այս մեքենայի սերիական արտադրությունը:
Նոր մեքենայի երկարությունը կկազմի 4,550սմ, լայնությունը` 1,920սմ, բարձրությունը` 1,240սմ, անվադողերի միջև հեռավորություն` 2,620սմ: 2+2 ֆորմուլայով տարբերակի համար պլանավորվում է օգտագործել մետաղյա հենք, իսկ թափքային որոշ մասեր կլինեն ապակեթելերից: Այն կունենա 1,160 կգ քաշ:
Հետևի քառշակ անիվներ ունեցող Juliani Veela-ն կունենա ութ ցիլինդրանոց, 6,2 լիտր աշխատանքային ծավալով և 520 ձիաուժ հզորությամբ շարժիչ. որը աշխատելու է 6 աստիճան մեխանիկական փոխանցումատուփի հետ: Ընկերությունում հավաստիացնում են, որ 0-100կմ/ժ արագությանը մեքենան կարող է հասնել 3,4 վայրկյանում, իսկ մինչև 160կմ/ժ` 7,6 վայրկյանում:
Մաքսիմալ արագությունը կազմելու է 310 կմ/ժ:
Բացի այդ մեքենան կունենա անկախ կախոց և՛ հետևից, և՛ առջևից, կարբոնե կարդանային սռնակ, բարձրացող շփմամբ դիֆֆերենցիալ, կառավարվող Ohlins հարվածամեղմիչներ, ինչպես նաև լուսադիոդային լուսարձակներ: Արգելակման համակարգը մատակարարելու է Brembo ընկերությունը: Նրանում առկա կլինի նաև iPad 2: Նրա օգնությամբ պետք է կարգավորվի մեքենայի աուդիո և նավիգացիոն համակարգերը, հեռախոսը, ձայնագրման համակարգը, որը տեղադրված է մեքենայում:
«Մեքենան ստեղծված չի արագընթաց ճանապարհների համար, այլ ամենօրյա հաճույքի, ընտանեկան ուղևորությունների և բեռնախցիկ մեծ տարողությամբ, որտեղ կտեղավորվի գոլֆի համար անհրաժեշտ հարմարանքները», – ասվում է Juliani Automobili ընկերության պաշտոնական հաղորդագրության մեջ: