Առեւտրի միջազգային կազմակերպությունը (ԱՄԿ) մերժել է Ուկրաինայի խնդրանքը` Հայաստանի հետ ունեցած առեւտրային վեճը լուծելու համար խումբ ստեղծելու վերաբերյալ: Այս մասին գրում է Коммерсант-Украина-ն:
Ուկրաինան Հայաստանին մեղադրում է ծխախոտային եւ ալկոհոլային ներմուծման համար ոչ բարենպաստ պայմաններ ստեղծելու մեջ: Հուլիսի 20-ին ուկրաինական կողմը հարցում էր ներկայացրել ԱՄԿ` առեւտրային վեճերի լուծման խորհրդակցություններ սկսելու ուղղությամբ: Վեճի առարկա են ակցիզային գները. արտասահմանյանների համար այն կազմում է 6500 դրամ` 1000 սիգարետի գլանակի համար, իսկ հայկականինը` 4750 դրամ: Բարձր են նաեւ, ըստ ուկրաինացիների, ալկոհոլային ապրանքներից վերցվող ակցիզային վճարները` մոտ 2200 դրամ:
Ուկրաինան դիմել էր ԱՄԿ-ին խումբ ստեղծելու համար այն բանից հետո, երբ խորհրդակցություններին Հայաստանը չի մասնակցել` անտեսելով դրանք: Ուկրաինական եւ հայկական կողմերը ոչ ֆորմալ հանդիպել են այս տարվա հոկտեմբերի 21-ին: Դրա ժամանակ հայկական կողմը ներկայացրել է խնդրի լուծման իր տարբերակը: Ըստ այդմ, հայկական կողմը վեճը լուծելու համար առաջարկել է մինչեւ 2014թ. հավասարեցնել ծխախոտային ակցիզները: Ինչ վերաբերում է ալկոհոլին, ապա 2011թ.-ից պաշտոնական Երեւանը համաձայնել է հավասարեցնել ակցիզային գները, բայց միայն օղու համար:
ԱՄԿ-ն իր մերժման որոշման մեջ ասում է, որ խումբը չի ստեղծվել, քանի որ Հայաստանն օգտագործել է իր իրավունքը եւ հետաձգել է հանդիպումը մեկ ամսով` հնարավորություն ստանալով նոր խորհրդակցությունների համար: