ԼՂՀ ԱԺ փոխնախագահ, ԱԺ-ում մեծամասնություն կազմող «Ազատ Հայրենիք» կուսակցության անդամ Արթուր Թովմասյանը, 1in.am-ի հետ զրույցում գնահատելով Աստրախանում կայացած Սերժ Սարգսյան-Դմիտրի Մեդվեդեւ-Իլհամ Ալիեւ եռակողմ հանդիպումը ու նաեւ Աստանայում նմանատիպ հանդիպմանն անդրադառնալով, հայտարարեց, թե ինքը որեւէ հանդիպումից իրական ակնկալիքներ է սպասում այն ժամանակ, երբ բանակցությունները ընթանան իրական ֆորմատով: «Ակնկալիքներ կարող են լինել միայն այն ժամանակ, երբ ԼՂՀ իշխանությունները միանան բանակցություններին որպես բանակցող կողմ»,- նշեց Թովմասյանը:
Հարցին էլ, թե որքա՞ն հավանական է, որ Աստանայում կարող է ինչ-ոչ փաստաթուղթ ստորագրվել, Թովմասյանն ի պատասխան առաջարկեց ենթադրություններով չտարվել: «Ենթադրություններով չտարվենք, բայց ակնհայտ է, որ առանց Ղարաբաղի իշխանությունների մասնակցության ստորագրված ցանկացած փաստաթուղթ մնալու է թղթի վրա: Բանակցությունները պետք է նորից եռակողմ լինեն, այնպես, ինչպես Բուդապեշտյան գագաթնաժողովից հետո»,- նշեց ԼՂՀ ԱԺն փոխնախագահը: