Գյումրիում այսօր սկսված «փողոցների փակման օպերիացիաները», որն իրականացվեց երկկողմանի, հետաքրքիր զարգացումներ ունեցավ:
Այն բանից հետո, երբ փողոցները փակած ցուցարարներին միացան բազմաթիվ քաղաքացիներ` նրանց թիվը հասցնելով 550-600 մարդու, իսկ «Ժառանգության» պատգամավորների գլխավորությամբ մեքենաները (այդ թվում ոստիկանական) հետ մղվեցին` չկարողանալով անցնել փողոցով, բարձրաստիճան իշխանավորները սկսեցին զանգել «Ժառանգության» պատգամավորների բջջային հեռախոսներին` իբր տեղեկանալու, թե ինչ է կատարվում: «Այս պահին չեմ ուզում նրանց անունները տալ»,- ասաց Ս.Սաֆարյանը «Առաջին լրատվականին»:
Այնուհետև որտեղից որտեղ հայտնվեց վերջերս ԱԺ ԲՀԿ խմբակցություն մտած, Գյումրիից ընտրված պատգամավոր Մարտուն Գրիգորյանը և ասաց, թե ԱԺ մեկ այլ պատգամավոր` Սամվել Բալասանյանը այս խնդրի հետ կապված օրինագիծ է պատրաստում ներկայացնելու ԱԺ: Լսելով դա` Ս.Սաֆարյանը հայտարարեց, թե եթե ԲՀԿ-ն այդքան շահագրգռված է այս հարցով, ուրեմն «Ժառանգությունը» կնախաձեռնի ԱԺ արտահերթ նստաշրջան և կառաջարկի ԲՀԿ-ին, ինչպես նաև ՀՅԴ-ին ստորագրել արտահերթ նստաշրջան հրավիրելու վերաբերյալ այդ նախաձեռնությունը:
Ս.Սաֆարյանի խոսքով, այդպիսով հնարավոր կլինի փոփոխություններ կատարել այդ չարաբաստիկ մաքսային օրենսգրքում: Ի վերջո «Ժառանգության» վարչության անդամ Ռ.Հակոբյանը համաձայնության եկավ ոստիկանների հետ այն հարցում, որ եթե վերջիններս մեքենաների պաշարումը վերացնեն, ապա ցուցարարներն էլ կբացեն փողոցները:
Այդպես էլ եղավ` ժամը 18:40-ի սահմաններում ոստիկանները վերացրեցին շրջապակումը, որից հետո ցուցարարները «Հաղթանակ» ու «Ժառանգություն» վանկարկելով փակված տարբեր փողոցներից միացան իրար և դարձյալ մի կարճ հանրահավաք տեղի ունեցավ: Ելույթ ունեցան «Ժառանգություն» խմբակցության պատգամավորներն ու վարչության անդամները` տեղեկացնելով ԱԺ արտահերթ նիստ հրավիրելու և ԲՀԿ-ին ու ՀՅԴ-ին դիմելու իրենց որոշման մասին:
