Այսօր` առավոտյան ժամը 8-ից, Գյուրմրիում ոստիկանները շրջապատել են դեպի մայրաքաղաք եկող մեքենաները, փակել են Սայաթ-Նովա փողոցը, որը գտնվում է միջպետական ճանապարհի վրա: Այս մասին հաղորդագրություն է տարածել «Ժառանգություն» կուսակցությունը:
«Ինչպես տեղեկացրել էինք, այսօր ժամը 11-ին ՀՀ կառավարության շենքի դիմաց պետք է տեղի ունենար Շիրակի, Լոռու և Տավուշի մարզերի` վրացական պետհամարանիշներով ավտոմեքենաներ ունեցող վարորդների բողոքի ցույցը: Վարորդների խնդրանքով վաղ առավոտյան “Ժառանգություն” խմբակցության պատգամավորներ Ստեփան Սաֆարյանն ու Զարուհի Փոստանջյանը մեկնել էին Գյումրի, իսկ Արմեն Մարտիրոսյանը` Վանաձոր, որպեսզի Երևան ուղեկցեն ցույցի մասնակիցներին: Պարզվեց, որ Գյումրիում` չնայած ամբողջ գիշեր “իրավապահ” մարմինների գործադրած ճնշումներին, մեկ տասնյակից ավելի ավտոտերեր, այնուամենայնիվ, առավոտյան հավաքվեցին Գյումրու դրամատիկական թատրոնի շենքի դիմաց: Իսկ շուրջ 100 մեքենաներ քաղաքի տարբեր հատվածներում սպասում էին ակցիայի սկսվելուն, որպեսզի միանան իրենց բախտակիցներին:
Ոստիկանները` խմբվելով տարբեր խաչմերուկներում, ամեն կերպ փորձում էին խուսափել պատգամավորներին հետ շփումներից: Ժամը ուղիղ 8-ին, երբ ցույցի մասնակիցներն արդեն ուզում էին շարժվել դեպի Երևան, 15-ի չափ ոստիկանական մեքենաներ “Կոլցո” գործողությամբ օղակի մեջ առան բողոքող վարորդներին ու պատգամավորներին: Ոստիկանները հրաժարվեցին հիմնավորել կամ բացատրել քաղաքացիների ազատ տեղաշարժը խափանող իրենց գործողությունները: Այս պահի դրությամբ շուրջ 100 ոստիկան պաշարման մեջ են պահում թատրոնին հարակից Սայաթ-Նովայի պողոտան (միաժամանակ խոչընդոտելով գյումրեցիների բնականոն երթևեկությունը):
Պատգամավորները հեռախոսով կապվել են ՀՀ ոստիկանապետ Ալիկ Սարգսյանի և ԱԺ նախագահ Հովիկ Աբրահամյանի հետ` ներկայացնելով ոստիկանության ապօրինի գործողություններն ու պահանջելով միջոցներ ձեռնարկել, սակայն իրավիճակն առայժմ մնում է անփոփոխ:
Գյումրիի դրամատիկական թատրոնի հարակից տարածքում, որը դեռևս շրջափակված է ոստիկանության կողմից, ժամը 13:30-ին նախատեսված է անցկացնել հանրահավաք:
Նույն վիճակն է տիրում նաև Վանաձորում, որտեղ հասարակական կարգի պահապաններն առանց որևէ բացատրության փակել են շուրջ 10 ավտոմեքենաների ճանապարհը դեպի մայրաքաղաք: “Ժառանգություն” խմբակցության անդամ Արմեն Մարտիրոսյանը հանցագործության մասին հաղորդագրություն է թողել ոստիկանության 1-02 հեռախոսահամարով: Այսօրինակ գործողությունները, կարծում ենք, հանցանք են սեփական ժողովրդի հանդեպ, որոնք, ըստ էության, կատարվում են երկրի բարձրագույն իշխանության լռելյայն անտարբերության իրադրությունում:
Հիշեցնենք, որ վարորդներն արդեն մեկ շաբաթից ավելի տևող բողոքի գործողություններով պահանջում են չեղյալ համարել ավտոմեքենաների “ժամանակավոր ներմուծման” ռեժիմով Հայաստան մուտքի սահմանափակումները և բարեփոխել արտասահմանյան համարանիշներով մեքենաների մաքսային արժեքի որոշման թալանչիական պայմանները:
Հիշեցնենք, որ Շիրակի մարզի և Լոռու մարզի այն վարաորդները, որոնք բողոքում են «ժամանակավոր ներմուծում» ռեժիմի հետ կապված մաքսային օրենսգրքում վերջերս կատարված փոփոխության դեմ, որոշել էին այսօր ժամը 11-ին բողոքի ակցիա իրականացնել ՀՀ կառավարության շենքի դիմաց:
Ինչպես հաղորդում են «Ժառանգություն» կուսակցությունից, այս պահին ևս Գյումրիի Սայաթ Նովա փողոցում երթևեկությունը շարունակում է խափանված մնալ: Փակվել են նաև Երևան եկող ավտոմեքենաների ճանապարհը:
Գյումրիում հավաքված Շիրակի մարզի վարորդները որոշել են բողոքի ակցիա անցկացնել: Գյումրում են գտնվում «Ժառանգություն» խմբակցության պատգամավորներ Ստեփան Սաֆարյանն ու Զարուհի Փոստանջյանը»,- նշված է այդ հաղորդագրությունում: